Norwich laka tlawm Benitez dinhmun a nghing

Inrinni zan Premier League inkhelah Norwich City chuan 2-1 in Everton an hneh a, Toffees coach Rafael Benitez dinhmun a derthawng mek - he thuziak i chhiar meuh chuan an inban fel tawh hial mai thei.

Everton defender Michael Keane chuan minute 16-na lekah an lamah a ti goal a, minute hnih liam hnuah Adam Idah chuan Norwich tan a khung ve leh bawk - minute 60-naa Richarlison goal khungin Everton a chhan zo lo.

Benitez chuan, "Ka kutah engmah a awm tawh lo," tiin ban hmabak a nih thu a hai lo. Spanish coach chuan sawi zawmin, "Tun hnai kum nga chhunga kan buaina chingfel turin ka lo kal a, tuna ka tih tur chu kan tihsual zirchian a, nakina kan tih nawn lohna tura ruahmanna siam a ni," a ti.

Spanish coach chuan, "Kan tihsual aṭanga kan inzir lo hian min tilawm lo a ni. A hmaa kan tihsualah bawk kan chesual leh ṭhin. Insiamṭhat kan tum a, mahse, khelmual kan luhin buai ṭhin a ni.

"Kan hma hun thlir ranin zawi zawiin kan bei a, player thar lalutin player hmasawnna pawh kan ngaihtuah a, mahse, a pawimawh ber chu khelmuala chak a ni," a ti.

Kar hmasaa FA Cup third round aṭanga Hull City an hnawhchhuah ṭumin fan-ten Benitez duh lohna banner an keng a, Norwich lakah pawh Spanish coach chhuak tura an duh thu inziahna banner a langsar hle.

Benitez-a hnuaiah Everton-in league match 19 khelin vawi nga chiah an la chak a, vawi li draw neiin vawi 10 an tlawm tawh - Spanish manager an la kawl reng hi a mak zawk!