Rangnick hnuaiah buaina awm?

Manchester United-in manager lailawk atan Ralf Rangnick an lalut a, German manager hnuaiah beiseina sang tak nei mah se an rin ang result an nei ṭha tawk lo. Result ṭha lo hian club chhungah boruak ṭha lo a siam.

Aston Villa nena an inhnehtawk ṭum hian Ralf Rangnick-a'n squad-ah Anthony Martial a tel lo a, inkhel tura inpeih tawha insawi Cristiano Ronaldo pawh a tel chuang lo.

Inkhelh banah Rangnick chuan, "Anthony Martial-a'n squad-a awm a duh lo. Dan naranin ani chu squad-a awm tur a ni a, squad-a awm a duh miau loh avangin a zin ve lo," tiin a sawi a, Ronaldo inhliam thu a sawi bawk.

Kum 26 mi Martial hian Man United chhuahsan a duh a, Sevilla nen sawizawm ni mah se Spanish club hian French forward hlawh phut zat leh Man United-in a man atana an beisei zat an pe ngam lo.

Chutihrualin Martial hian chhuah duh mah se Man United tana khel duh lo anga sawi erawh a duh lo hle. Martial chuan, "Man United tan vawi khatmah khelh duh loh ka nei ngai lo ang. Kum sarih chhung ka awm tawh a, club leh fan-te chungah zah lohna kan lantir dawn lo," tiin a sawi.

German manager Ralf Rangnick hi a player Martial-a'n a chhang ngam a, dressing boruak a ṭha loh tih thuthang awm dikna a lang. French forward hian Ole Gunnar Solskjaer hnuaiah January 2019 khan contract thar a ziak a, kum 2024 thleng contract a nei mek.