City an tawlhthlu; Liverpool an kal zel
Inrinni zan khan tun season Premier League-a inel ber tura ngaih Manchester City leh Liverpool an inlan ve ve a, City-in point khat chiah an hlawhchhuah laiin Reds erawhin point thum an hmu.
Manchester City hian an mikhualna ramah Premier League kai thar Wolverhampton Wanderers chu 1-1 in an inhnehtawkpui a, Liverpool-in 1-0 in an mikhual Brighton & Hove Albion an hneh thung.
Match khelh hmasa pahniha vawi hnih chak thei zingah City leh Bournemouth-in an khingpui an inhnehtawkpui ve ve avangin Liverpool chu he thu buatsaih a nih thleng hian match hmasa pathuma chak vek thei awm chhun an ni.
Hriat tel atana ṭha erawh vawi hnih tho chak tawh team pahnih Watford leh Chelsea chu nizan khan an inlan a, he thu buatsaih a nih lai hian an result kan hre hman lo.
City an vanduai
Pep Guardiola nauten an match hmasa pahnihah awlsam takin Arsenal leh Huddersfield Town an hneh a, Wolves lakah pawh harsatna nei lo tura ngaih an ni - beisei ang ngawt erawhin thil a kal lo.
Wolves goal-ah Portugal international Rui Patricio a ding nghet tlat a, yard 25 vela hla aṭanga Raheem Sterling goal shot ṭha zet chu bar a nam per a, hei chauh lo pawh save ṭha vawi tam a nei.
Huddersfield laka hattrick siamtu Sergio Aguero chuan vawi hnih ngawt woodwork a tih per a, an goal chhuah danah City an vanduai tel bawk. Minute 57-naah Willy Boly chuan Wolves tan a khung a, a tauh luh niin lang mah se a kut a per vanga lut a ni.
Minute 69-naah Wolves an che sual zui. Ilkay Gundogan free kick aṭanga ball kal chu vengtu nei lo Aymeric Laporte chuan ṭha taka tlan lut chungin a tauh lut a, goal dang lut loin point an insem.
Fak tlak Wolves
City an vanduai rualin Wolves hi vanneih hrim hrim vanga chaka chhiar chi an ni bik lo. Raul Jimenez goal khung chu offside vangin pawm sak an ni lo a, 29% lek ball an chang chungin vawi 11 ngawt shot an nei ve tho bawk.
Wolves manager Nuno Espirito Santo pawhin a naute fakin,"An tan chuan hnehna chan tluk zet a ni. Eng team pawh tum dawn ila kan thiam dan bera khelhchhuah hi kan tih tur chu a ni a, kan tih tur ṭha takin kan ti a ni," a ti.
Man City boss Pep pawhin chak loh chhuanlam a zawng duh lo a, Spanish manager chuan hnehna chan phu zawkin hnehna an chan thu a sawi. Barcelona boss hlui chuan, "Chance vawi tam kan nei a, mahse an keeper khan ṭha takin a dang zel bawk si a ni.
"Tlarhnung kan phui tawk lo a, chuvang chuan vawi tam chance kan siamsak. A pumpuia thlir erawhin team ṭha tak kan tum avangin kan khel chhe lo a, Wolves hian fak an phu a ni," a ti.
Sa laa laa Salah!
Brighton-in 3-2 in Manchester United an hneh a, inrintawkna sang tak nen Anfield an pan. Mahse, Liverpool lakah erawh Red Devils laka team hmuhnawm kha team satliah an ni a, chak phu zawk Liverpool-in Mohamed Salah goal khung hmangin hnehna an chang.
Salah-a'n vawi tam pass sual leh ball dawn sual a neih bakah chance a khawhral nual a, a ṭhat dan berin a khel lo - a pawimawh ber erawh goal a khung hi a ni a, 'one season wonder' tia an sawi chu a dik lohna a thlentir zel.
Egyptian forward hian Anfield-a match 29-a khelhah goal 29 a khung tawh a, season hmasa ṭantir aṭanga chhiarin Premier League goal 45 (34 goals & 11 assists)-ah a inrawlh tawh bawk - amah hnaih bertu aiin goal 12-in a sang zawk.
Liverpool tan Sadio Mane chuan Salah siamsak chu uiawm zetin a pet lut lo a, Trent Alexander-Arnold-a'n freekick hmanga bar a tih per bakah Roberto Firmino tauh luh ngei tur nia lang chu Mat Ryan chuan ṭha zetin a dang bawk.
Hmasawn mamawh Reds
Anfield-a inkhelah an ṭhat dan berin Liverpool an khel chhuak lo tih a chiang a, tlarhnungah goalkeeper Alisson-a'n Pascal Gross pet ṭha zeta a dang chu an vanneihpui hle.
Klopp pawhin an ṭhat dan bera an khelhchhuah loh thu a pha lo. German coach chuan, "Pep-a'n player-te 100% a an la fit loh thu a sawi a, keini pawh chutiang tho chu a ni. Nipui chawlh pawh nei mang loin pre-season rei lote chauh kan nei a, an ṭhat dan bera khel chhuak nghal tura player te beisei a harsa a ni.
"Player ten hmasawnna tur an nei tih zanina kan inkhelh hma aṭangin ka hre tawh a, tunah chuan ka hrechiang lehzual a ni," tiin theihtawp an chhuah chhunzawm zel tur thu a sawi.
Klopp chuan table lam an la thlir loh thu sawi nghalin, "Match thum chauh a la ni a, table lam sawi rik a la hun lo. A pawimawh ber chu point kua kan hlawh chhuak tawh hi a ni. Ka naute aṭangin hei aia ṭha zawk ka la beisei a, hma kan sawn theih pawh ka ring tlat," a ti a, la tlawm lo mah se an khelh danah hmasawn an mamawhah a ngai.
Inkhel Result
Wolverhampton 1 - 1 Manchester City
Bournemouth 2 - 2 Everton
Arsenal 3 - 1 West Ham United
Huddersfield Town 0 - 0 Cardiff City
Southampton 1 - 2 Leicester City
Liverpool 1 - 0 Brighton & Hove
Team Dinhmun
# Team Pld W D L GF GA GD Pts
1 Liverpool 3 3 0 0 7 0 7 9
2 Manchester City 3 2 1 0 9 2 7 7
3 Bournemouth 3 2 1 0 6 3 3 7
4 Chelsea 2 2 0 0 6 2 4 6
5 Watford 2 2 0 0 5 1 4 6
6 Tottenham Hotspur 2 2 0 0 5 2 3 6
7 Leicester City 3 2 0 1 5 3 2 6
8 Everton 3 1 2 0 6 5 1 5
9 Manchester United 2 1 0 1 4 4 0 3
10 Crystal Palace 2 1 0 1 2 2 0 3
11 Arsenal 3 1 0 2 5 6 -1 3
12 Brighton & Hove 3 1 0 2 3 5 -2 3
13 Wolverhampton 3 0 2 1 3 5 -2 2
14 Cardiff City 3 0 2 1 0 2 -2 2
15 Newcastle United 2 0 1 1 1 2 -1 1
16 Southampton 3 0 1 2 2 4 -2 1
17 Burnley 2 0 1 1 1 3 -2 1
18 Huddersfield Town 3 0 1 2 1 9 -8 1
19 Fulham 2 0 0 2 1 5 -4 0
20 West Ham United 3 0 0 3 2 9 -7 0