Mizoram U15 League a nung chho zel

Tata Trusts leh MFA ṭang kawpin an buatsaih, Mizoram Under 15 League chu Rajiv Gandhi Stadium, Mualpuiah khelh chhoh mek zel a ni a, Inrinni khan round 5-na khelh a ni.

Aizawl Grassroots Center-in pakhatna dinhmun sawhngheh nan Competitors for Christ chu 7-0 in an sawp.

Aizawl FC Academy-in team ṭha bera ngaih Tata Trust COE an hneh hnuah MPL lama an elpui Chanmari FC nen 2-2 in an inhnehtawk.

COE erawh match hnih chhung chak hmel an hmuh loh hnuah Sihphir Venghlun FC 4-0 in an hneh a, an thiamna an pholang leh tawh.

Inkhel dang pahnih chu table laihawl inbeihna tiin a sawi theih a, Republic Veng aiawh M28 Academy chuan injury time-ah Kanan FC 2-1 in an hneh hram a; Armed Veng club FC Stonzz leh Bawngkawn GSA te 1-1 in an inhnehtawk bawk.

Ruihhlo dona

Mizoram Under 15 League hi football inelna a nih piah lamah ruihhlo dona a ni nghal a, hemi kawngah hian MFA leh Social Welfare Department te an ṭangkawp.

Inkhelh hma apiangin naupangten ruihhlo dona thuchah an sawi rual ṭhin a, Social Welfare dept lam hian player-te rilruah ruihlo dona thinlung tuh an tum.

Under 15 League-ah hian rawlthar 300 rual an inziak lut a, heng naupang zinga ṭhahnem tak hian nasa takin football-ah hma an sawn dawn. Chumi piah lamah chuan rawlthar 300 rual zinga a tam zawkin ruihhlo do duhna thinlung an put phah chuan kum bithliah inelna hlawhtlinna hi a belhchhah ang.

Naupangte hian 'ruihhlo ti lo ngam khawpin huaisen ang che' tih te chu an inkhelh hmaa an sawi rual zinga mi a ni a; MFA chuan football zinkawnga an hlawhtlin theih nan huaisen ngei turin a beisei a, duhsakna a hlan bawk.