Sept 29 aṭangin Indian Super League

Indian Super League 2018-19 season chu September 29 ṭangin khelh ṭan a ni dawn a, opening match-ah hian vawi hnih champion tawh ATK leh Kerala Blasters te an inkhel dawn. Season liam ta khan team pahnih hi match hmasa berah an intawng tawh bawk a, khami ṭum khan Kochi-ah khelh a ni a, tun ṭumah erawh Salt Lake Stadium-ah khelh a ni thung dawn.

ISL chuan phase 1 fixtures an tichhuak phawt a, season chawhnu lam kum 2019 lama khelh tur hi la tihchhuah leh tur a ni. Tun season-ah hian ni khatah match khat zel a awm a, inkhel zawng zawng hi zan dar 7:30-ah khelh ṭan a ni ang.

ISL hi October 2013 aṭangin khelh ṭan a ni a, ṭum li neih tawhah ATK leh Chennaiyin FC ten vawi hnih ve ve nomawi an chawi. Champion lai Chennaiyin hi September 30-ah nikum final-a an hmachhawn leh an hmelma Bengaluru FC nen an inkhel leh nghal dawn.

NorthEast United-in tun season-a an match hmasa berah October 1 khian FC Goa an mikhual ang a, October 2-ah Jamshedpur FC-in Mumbai City an tlawh ang. October 3-ah Delhi Dynamos-in an mualah Pune City an hmachhawn dawn thung.

Season tharah chuan FIFA dan zulin international break vawi thum a awm dawn a, phase 1-ah ṭum hnih October 8-16 leh November 12-20 ah a awm dawn.