An mualah Juve an chak

Juventus chuan Inrinni zan khan an mikhual Lazio chu 2-0 in an hneh a, forward Cristiano Ronaldo-a'n a club thar tan anmahni muala a match hmasa berah goal khung lo mah se Turin club-in Miralem Pjanic leh Mario Mandzukic te goal hmangin point thum an hmu.

Juve point 6
Juventus stadium-a inkhelah chawlhlawk hmain Pjanic chuan yard 25-a hla aṭangin goal hmahruai a thlawh lut a, second half-ah striker Mandzukic-a'n hnai tak aṭangin an goal hnihna a khung thung - match hmasa lama goal khungtu Sami Khedira erawh a vannei nawn lo, Germany international midfielder ball pet hian ban a per hlauh.

Real Madrid forward hlui Ronaldo hian nipui bazar lai khan pound maktaduai 99.2-in Juventus hi a zawm a, Italian champion tan Serie A match hnih a khelh tawhah tlarhma laiah chhawr ni mah se goal a la khung lo - first half chhungin Lazio box chhungah ball vawi khat chiah a tawk a ni.

Massimiliano Allegri nau­te hian league match hnih an khelhah point ruk hmuin hmahruaitu an ni a, a zawna a vawi riat nan Serie A champion nih an tumna kawngah bul an ṭan fuh hle.

Ancelotti naute an huai
Inrinni zan inkhel dangah season hmasa pahnihna Napoli chuan si hnih an phurh zet hnuah an mikhual AC Milan chu 3-2 in an hneh let a, Carlo Ancelotti naute hian point ruk hmuin nikum ang bawkin Juventus nen an inum na leh hle tura ngaih a ni.

Mikhual Milan lamin Gia­como Bonaventura leh Davide Calabria te goal hmangin hma an hruai a, khualmualah point thum an hmu ngei tura ngaih a ni. Mahse, Napoli tan Polish midfielder Piotr Zielinski-a'n an goal phurh pahnih a sut bakah, hun tawp hma minute 10 chauh a awm tawh tihin striker Dries Mertens-a'n chakna goal a khung.

Kum 59 mi Ancelotti hi player a nih laiin Milan tan a khel ṭhin a, manager a nih hnuah pawh European Cup vawi hnih a chawipui. Juventus leh Parma pawh enkawl tawhtu hian kum tam tak hnuah a club hlui a hmachhawn a, amah anga Italian manager tho Gennaro Gattuso lakah tawnhriat a ngah zawk avangin point an hmu.

Bayern Munich manager hlui Ancelotti hian a match hmasa zawkah Lazio chu 2-1 in a hneh tawh bawk a, match hnihah point ruk hmuin an elpui Juventus nen an point neih zat a inang.