Nadal ringtu McEnroe

American tennis player hlui Patrick John McEnroe chuan US Open khelh turah Rafael Nadal chu champion tura rinkai a nih thu a sawi a, hetih lai hian mi tam takin Novak Djokovic an dah sang thung.

World number 1 Nadal hian Thawhlehni zing dar 5:45 hian a match hmasa ber atan a hnam pui David Ferrer a hmachhawn dawn, tun season chhunga a pahnihna ni turin Grand Slam nomawi chawi a tum.

McEnroe chuan, "Nadal hian Canada-ah ṭha takin inbuatsaihna a nei a, kei chuan champion tura ka rin ber a ni. Cincinnati Open-ah Djokovic a champion thung a, hei vang hian mi tam takin an dah sang, kei erawh chuan champion lai hi ka dah sang zawk," tiin a ngaihdan tlang takin a sawi.

Spanish star Nadal leh Serbian tlangval Djokovic te bakah hian Roger Federer leh Andy Murray te chu boruak nei lian tur an ni. Britain tlangval Murray hian zaninah a match hmasa ber atan James Duckworth a hmachhawn dawn a, player dang hi chu a ni hmasa berah a inlan nghal dawn lo.

Season kal laia Grand Slam hnuhnung ber US Open hi zanin dar 8:30 aṭangin main draw khelh ṭan tur a ni a, match hnihna a khel tur Grand Slam vawi thum champion tawh Stan Wawrinka leh seeded pariatna Grigor Dimitrov te inkhel hi mipui ngaihven a ni ang.