Singh Toor-a'n record siamin gold a dawng

Tajinderpal Singh Toor chuan Inrinni khan 18th Asian Games khelh mekah gold medal a dawng. Kum 23 mi Singh Toor hian lung den (shot put) huangah 20.75m zeta thui a deng a, pakhatna a nih bakah Asian Games record thar a siam nghal bawk.

Kum ruk liam ta khan Om Prakash Karhana chuan 20.69m a thui dengin record a lo siam tawh a, he record dinglai hi India tlangval hian a rawn khum chiah. A hnungah hian China tlangval Liu Yang chuan 19.52m dengin silver a la a, bronze medal latu Ivan Ivanov chuan 19.40m a thui a deng thung.

Record thar siamtu Tajinder chuan, "Ka pa Karam Singh chu tun hnai kum hnih chhung hian cancer natna in a tlakbuak avangin a buai hle, he hnehna ka chan hi a tan ka hlan. A hringnun hman hi a harsa ve hle a, chutih rualin thil tih apianga theihtawp chhuah duh mi a ni, kei pawh indiamna huanga insawrbing turin min ti," tiin a sawi.

Nimin tlai thleng khan India chuan gold pasarih lain a pumpuiah pariatna an ni mek a, hmahruaitu China chuan gold 72 teh meuh an la tawh thung. Inelna pumpuiah hian ram hrang 32-in medal an la tawh a ni.

Medal la vaw chhuak chiah lo mah se India mipa leh hmeichhe hockey team chuan hmalam an pan zel. Mizo nula Lalremsiami Hmar telna India hian an pool match thumna atan South Korea chu 4-1 a hnehin semifinal an lut. An match hnuhnung ber atan zanin dar 12:30 hian Thailand nen an inkhel leh ang.

Badminton lamah pawh medal beiseina a la nung zel, Saina Nehwal chuan Rifqi Fitriadi lakah 21-6, 21-14 a hnehna changin quarterfinal a lut a, Indian shuttler pakhat zawk PV Sindhu pawhin Tunjung Mariska chu 21-12, 21-15 in a hneh bawk. Satwiksairaj Rankireddy leh Chirag Shetty te ṭang dun erawh men's doubles last 16 paltlang zo loin an tla.

Asian Games 2018 Medal Table
# Ram Gold Silver Bronze Total
1 China 72 51 31 139
2 Japan 37 32 44 113
3 South Korea 25 27 34 86
4 Iran 14 13 9 36
5 Indonesia 11 12 18 41
6 North Korea 10 5 7 22
7 Thailand 8 8 26 42
8 India 7 7 17 31
9 Chinese Taipei 7 11 13 31
10 Uzbekistan 5 10 9 24
11 Kazakhstan 4 7 27 38
12 UAE 3 4 1 8
13 Mongolia 3 2 5 10
14 Hong Kong 2 6 13 21
15 Kyrgyzstan 2 4 6 12
16 Singapore 2 2 8 12
17 Cambodia 2 0 1 3
18 Vietnam 1 7 10 18
19 Malaysia 1 4 3 8
20 Macau 1 2 1 4
21 Jordan 1 1 5 7
22 Lebanon 1 1 2 4
23 Philippines 1 0 9 10
24 Iraq 1 0 0 1
25 Bahrain 1 2 0 2
26 Turkmenistan 0 1 2 3
27 Qatar 0 1 1 2
27 Saudi Arabia 0 1 1 2
29 Laos 0 1 2 1
30 Myanmar 0 0 2 2
30 Pakistan 0 0 2 2
32 Unified Korea 0 0 1 1
32 Afghanistan 0 0 1 1
Note: Table hi nimin tlai thlenga an dinhmun a ni a, inelna hi neih chhunzawm reng a nih avangin an dinhmun a danglam thei.