United buaina belhchhah tumtu Spurs

Tottenham Hotspur chu zanin dar 12:30 hian Manchester United hmachhawn turin Old Trafford-ah an lenglut dawn. Spurs striker Harry Kane chuan tun hmain August thlaah goal khung a ngai lo a, tun season Premier League-ah erawh August thla anchhia nuai bo turin Fulham lakah kar liam ta khan a khung a, England captain hi United tlarhnung tan ven uluk a ṭul ang.

Manchester United erawh nipui transfer-a an chet ṭhat tawk loh avangin club neitu leh manager Jose Mourinho inkar a khi a, match hnuhnung bera Brighton & Hove Albion an hneh loh bawk avangin inringtawkna tak tak an la nei lo niin a lang.

United beiseina

Old Trafford-ah Tottenham-in result ṭha an nei meuh lo a, Spurs-in 2014-a helai hmuna hnehna an chan hnuah London club zingah United khelmuala chak thei an awm lo.

Hemi hnu hian London club-in Old Trafford aṭanga point 66 hmuh theih aṭangin point sarih chiah an hlawh chhuak. Spurs bik hian kum 23 chhung chak hmel an hmuh loh hnuah Andre Villas-Boas leh Tim Sherwood te kaihhruaina hnuaiah season zawnin hnehna an chang a, Mauricio Pochettino hnuaiah erawh ṭum thum 1-0 vekin an chak lo. An inkhelh tawhna thlirletin United chu dinhmun ṭha zawk an ni a, amaherawhchu Brighton laka chak lo United dah san an har.

Bus Park

Portuguese manager-in team lian a hmachhawnin uchuak takin defensive game a khel ṭhin a, result ṭha ken tel loh ṭum a ngah bawk avangin United ṭantu ngei pawhin hmuh hrehawm an ti.

Amex Stadium-ah Mourinho-a'n club tenau a hmachhawn chungin defensive game a khel a, a chefuh lo. Old Trafford-ah United hi an huai hretin a rinawm a, amaherawhchu an khingpui tur hi Tottenham an miau avangin Mourinho hian a kalphung nghet tak hi a thlak a duh a rinawm loh.

An inpeih

Brighton hneh loh ṭumin Nemanja Matic, Antonio Valencia leh Alexis Sanchez te chu United squad-ah an tel lo. Inhliam vangin Matic leh Valencia te hi tun season-ah an la inlan lo hrim hrim a, tawnhriat nei ṭha pahnih hian training an ṭan tawh.

Mourinho chuan, "Brighton nena kan inkhelah khan tumah kan lawm lo. Chutihrualin kan result a ṭha emaw ṭha lo emaw pawh ni se thil kal tawh thlirlet hman kan ni lo. Tunah erawh training kan nei ṭha a, Spurs hmachhawn turin kan inpeih," tiin a sawi.

Thawhṭanni zana an inkhel tur chungchang sawiin, "Kan khel tlai hi ṭhatna riau a awm a, inpuahchahna ṭha nei tur leh kan player zinga hliam la nei ten dam turin hun an mamawh," tiin an inkhelh hun a tlai chu pawi a ti lo.

Portuguese manager Mourinho chuan club lian an hmachhawn dawn avangin Brighton nena an inkhelh ṭum ang a, tihsual a thiang tawh lo thu sawi lang bawk.

Chak duh Kane

Spurs manager Mauricio Pochettino-a'n nipui transfer-ah player lei miah lo mah se Premier League match hnih aṭangin point ruk an hlawh chhuak a, zaninah fiahna an hmachhawn dawn.

Tottenham striker Kane chuan, "Season ṭantirh a ni emaw season tawp lam pawh ni se a ṭha ber nih kan duh chuan inkhel pawimawh bikah hian chuan hnehna kan chan a ṭul a ni. United pawhin ṭha zawka khelh an duh ngei ang a, tu nge chungnung zawk chu inkhelh banah a hriat ang," tiin nomawi la thei zinga tel turin club lian hneh a ṭul thu a sawi.

England captain chuan sawi chhunzawmin, "Club lian parukte an ṭha vek a, chuvangin season bul ṭan ṭhat a ṭul. Kum dangah chuan December thla aṭangtein kan che ṭha chauh a, a tawp kan kharna chu pahnihna leh pathumna te a ni. Chuvangin inrintawkna nei turin season ṭantirh aṭanga kan chet ṭhat a ṭul," tiin an inkhel a pawimawh thu a sawi.

Premier League striker zinga goal khung thei ber zinga mi Harry Kane-a'n club lian paruk lakah hian goal 18 a khung tawh a, midfielder ṭha Dele Alli leh Christian Eriksen ten an chawm tur chu a hmuhnawm khawp ang.