Match 3-a vawi 3 chak Chelsea

Premier League season ṭan hmain Maurizio Sarri leh Chelsea ten rin an hlawh lo a, Blues fans ngei pawhin an manager hian eng tiang tak nge a tih theih an chiang bik lo. League match thum an khel a, Italian manager hian hnehna a chang vek - point kua hmuin Liverpool leh Watford te nen vawi thum chak thei an ni.

Pathianni zan St James' Park-a inkhelah Chelsea lamin inkhel thunun viau mah se hnehna chang turin vanneihna an mamawh tel. Eden Hazard-a'n Marcos Alonso hlawh penalty a khung bakah defender DeAndre Yedlin chuan an mahni lamah a ti lut palh a, Newcastle United lakah 2-1 in an chak. Magpies goal neih chhun hi substitute Joselu khung a ni thung.

Hazard bul ṭanna
World Cup khelh vangin Eden Hazard-a'n team training a zawm tlai a, chumi hnuah Spanish club lian Real Madrid nen sawi zawm a nih avangin Sarri kaihhruaina hnuaiah match hmasa pahnihah chuan bench-ah dah a ni, substitute nichungin assist vawi hnih a nei thei tho.

Belgium international forward hian Newcastle United lakah inkhel bul a ṭan ta a, tun season chhunga league match bika bul a ṭanna hmasa ber a ni. Mual sir lehlama awm Barcelona forward hlui Pedro nen tlarhma laia awm Alvaro Morata an thlawp.

Midfielder thar Jorginho leh tharum ngah Kante te hmangin Blues lamin inkhel an thunun a, 81% zet ball an chang. Mahse, Blues lamin a hmawr an bawk thei lo, Pedro, Cesar Azpilicueta leh Morata ten an hun ṭha neih an hlah vek a, defender Antonio Rudiger-a'n hla deuh tak aṭanga goal mawi a khung tur pawh crossbar in a dan sak.

Napoli manager hlui Sarri-a'n a hriat chian sa Jorginho a hmang thiam chhunzawm dawn niin a lang, Italian midfielder hian Magpies lakah vawi 158 ngawt pass dik a nei a, an khingpui team pumpuiin ball an pass dik (vawi 131) aiin a tam zawk - goal khung turin tawlh hma tir ni lo mah se tlarhnung nen an inthlun zawmna thahrui pawimawh a ni.

A tawpah goal 3
Rafael Benitez-a'n captain Jamaal Lascelles leh midfielder Jonjo Shelvey te a chhawr thei lo a, kar hmasa lama Cardiff nena inhnehtawk team aṭangin player paruk ngawt a siksawi, player pathum chuan club tana an match hmasa ber an khel.

Mualneitu lamin goal khung aiin a venhim lam an thupui a, an tlarhnung an din khawng bakah keeper Dubravka chuan a hna a thawk ṭha bawk. Mahse, ball chang hnem Blues dan reng theih an ni lo, minute 76-ah Fabian Schar chuan Alonso a ti tlu a - penalty pek a ni; Hazard tan penalty khung turin harsatna a awm lo.

Goal luh aṭanga minute sarihna leha Newcastle lamin an sut! Yedlin-a'n substitute Olivier Giroud ti tlua ball a chan hnuah Joselu tauh luh turin a siamsak a, goal zawna an 'shot' vawi hnih zinga pakhat a hlawhtling. Inkhel a lo tawp lo, Spanish defender Alonso ball pet chuu goal zawnah kal lo mah se Yedlin chuan an mahni goal-a lut turin a lo dang pial.

Eng nge a sawi?

Inkhel thlir kirin Chelsea boss Maurizio Sarri chuan, "Rafa Benitez-a nauten defender panga ni chunga an khel hi tun hma lamin ka la hmu ngai lo, hmachhawn an harsa hle, keini chauh ni loin midang tan pawh a awlsam lo ang, 1-1 a nih hnua chakna goal kan nei kha kan vannei," a ti.

Italian manger chuan Hazard chungchang sawi zuiin, "Eden Hazard khan a khel ṭha takzet a, chutih rualin minute 75-80 chhung vel khel se a la tawk chauh tur a ni. Mahse, Mateo Kovacic khan thlak a dil a, duhthlan tur dang a awm tawh lo," tiin a midfield rem dan a sawi.

Blues player maker Hazard hian Premier League-ah a club tan goal 70 a khung tling ta a, London club tana league goal khung hnem lama a tluk loh chu Frank Lampard (147goals) leh Didier Drogba (104) te chiah an ni.

Newcastle manager Rafael Benitez chuan, "Player paruk ngawt kan chhawr thei lo, ṭhat dan bera khel kan nih loh avangin a awlsam lo a ni. Player ṭhenkhat chu hliam vanga khel thei lo an ni a, a ṭhen chuan harsatna dang an nei. Hetiang chunga hna thawh a ngaih chang a awm.

"Penalty leh foul ṭhenkhat kan tawh kha chu hriatthiam a har deuh, chak loh chhuanlam erawh a ni lo. Season hmasa kham kan thil tum tihlawhtlingin 10-na kan ni phak a, kuminah pawh a aia sang zawk nih kan tum leh ang," tiin a sawi.

Hmabak
Chelsea hian Inrinni zan khian Stamford Bridge-ah Bournemouth an mikhual dawn, table-a pangana nilai Bournemouth hi match thum hnua la tlawm lo an ni a, awlsam taka nuai liam mai theih an ni kher lo ang.

Newcastle United erawh Nilaini zan hian League Cup second round khel turin Nottingham Forest-ah an zin dawn, kar tawpa an league match atan Manchester City khelmual Emihad Stadium-ah an lenglut zui dawn bawk.