Federer leh Djokovic inlan hun

Nizan khan US Open khelh ṭan a ni a, zanin dar 10:45 hian Novak Djokovic chuan a match hmasa ber a khel dawn, Nilaini zing dar 4:30-ah world number 2 Roger Federer a inlan zui bawk ang.

Grand Slam vawi 20 champion tawh Federer hian nikum ang bawkin clay court season a hmang lo a, grass court inelna lian Wimbledon-ah inlan mah se nomawi a chawi phak lo. Swiss star hian Cincinnati Masters khelin champion lo mah se final a thleng - US Open atan inbuatsiahna a nei ṭha tawk a ngaih a ni.

Kum 37 mi Federer chuan, "2004 aṭang khan ka thil tum chu a la ngai reng, hlawhtling takin hun rei tak chhung inkhelh theih ka duh. Inelna lian hi chawlhkar hnih chhung khelh ṭhin a ni a, hei vang hian ka kum ngaihtuahin a hma lama tournament khelh hnem hi ka tan a rem tawh lo.

"Mahse, inbuatsaihna neih loh chuan court chhungah duhthusama chet a har, Wimbledon hnuah chawlh ka nei hnem a, chumi hnuah hlawhtling takin inbuatsaihna ka nei leh bawk," a ti. A khingpui tur Japanese player Yoshihito Nishioka nen an vawi khat intawnna tur a ni a, harsa lutuk loin first round a paltlang tura ngaih a ni.

Player ropui Federer hian hnehna a chang chho zel a nih pawhin Rafael Nadal nen final hma chuan an intawng thei dawn lo, champion lai Nadal nen hian inelna hrang hrangah chuan inkhel hnem tawh hle mah se US Open bikah hian an la intawng ngai lo. Tennis player ropui pahnih, inelna hmuhnawm chhawp chhuaktute tan kumin hi an intawn theihna hun ṭha hnuhnung a ni tawh mai thei.

Federer leh Nadal te hming a langsar a, he tih lai hian hard court hmang thiam Djokovic sawi hmaih theih a ni bik lo ang. Serbian tlangval hian kar hmasa khan Federer hnehin Cincinnati Masters nomawi a chawi a, Grand Slam khelh hnuhnung ber Wimbledon champion a nih bawk avangin tun ṭumah hian rinkai a ni phak.

Arthur Ashe Stadium-ah Marton Fucsovics nen an intawng dawn a ni a, New York-a tennis stadium hmingthang hi Djokovic-a'n 2011 leh 2015-a nomawi a chawi tawhna hmun a nih avangin a mikhual lo ang - a chesual viau a nih loh chuan second round lut tura ngaih a ni.