Mizoram-in comeback ropui lantir

National Girls Football Championship quarterfinal-ah Mizoram chuan Jharkhand lehthalin semifinal an lut. August 29 hian semifinal-ah Manipur an hmachhawn ang.

Nimin inkhelah hian Mizoram tan hian Miriam Lal­nun­siami, Grace Lalrampari, K. Lalruatfeli leh Lalnuntluangi ten goal khat ṭheuh an khung.

Comeback

Mizoramin bul an ṭan fuh tawk lo. Jharkhand lamin first half-ah freekick hmangin goal hnih an khung. Injury time minute thumnaah Mizoram tan Bukpui tleirawl Miriam Lalnunsiami'n siphurh a sut ṭhen a, half time-ah 2-1 a ni.

Second half-ah Mizoram khel ṭha mah se goal khung an harsat a, hun tawp hma hretin Salem Veng tleirawl Grace Lalrampari penalty hmangin an sut a, hun pangngaiah 2-2 a ni.

Extra time-ah Mizoram

Vanbawng tleirawl K. Lalruatfeli chuan extra time first half-ah goal a khung a, a vawi khat nan Mizoramin hma an hruai. Amaherawhchu Jharkhand lamin first half-ah vek an sut.

Minute 110-naah goal thumna khungtu Feli'n dinglam aṭangin ṭha taka a lakluh hnuah ṭha zetin a vawrh lut a, Kolasib tleirawl Tluangi'n chakna goal khung nan a hmang.

Mizoram kalkawng

Mizoram hi group H-ah Delhi leh Rajasthan nen an awm ho a, match hmasa berah Delhi chu 2-1 in an hneh a. Group hmahruaitu ni turin Rajasthan chu 16-0 in an sawp leh bawk.

Coach Laltuakliana leh manager J. Laltuanpuii te kaihhruai team hian semifinal thleng turin Jharkhand chu extra time-ah 4-3 in an hneh leh a ni.