Japan leh S Korea chak

Asian Games 2018-ah nimin khan Japan leh South Korea chuan football semifinal thleng turin Saudi Arabia leh Uzbekistan an hneh.

Pakansari Stadium-ah Japan-in bul an ṭan ṭha a, Yuto Iwasaki hmangin minute 31-naah hma an hruai a. Amaherawhchu Saudi lamin Yugo Tatsuta-a'n an lama a tihluh zarah an sut.

Second half-ah Japan an khel ṭha chhunzawm a, minute 73-naah Daizen Maeda leh Iwasaki te inkawp chuan Saudi tlarhnung ṭhiatin Iwasaki-a'n a goal hnihna leh chakna goal a khung.

Quarterfinal inkhel dangah South Korea tan Hwang Ui-jo chuan hattrick a siam a, Uzbekistan tan Jaloiddin Masharipov leh Ikromjon Alibaev ten an khung a, Korean player Hyunsoo Hwang-a'n an lamah tilut bawkin hun pangngaiah 3-3 a ni.

Extra time khelh a ni a, minute 118-naah South Korea tan Red Bull Salzburg forward Hwang Hee-chuan chakna goal a khung.

Asian Games hi Under 23 inelna a ni a, senior player pathum tel theih niin South Korea tan hian Tottenham forward Son Heung-min pawh a inlan.

Semifinal hi August 29-ah khelh tur a ni a, South Korea hian Syria leh Vietnam chak zawk an hmachhawn ang a, Japan-in United Arab Emirates leh North Korea chak zawk an khelhpui ve bawk ang.