Vettel-a'n Hamilton nena inkar tizim
Sebastian Vettel chuan a elpui Lewis Hamilton lakah Formula 1 nomawi awlsam taka kal tir mai a tum bik lo. German driver hian Pathianni zan khan Belgian Grand Prix-ah hnehna a chang a, hmahruaitu Hamilton nen an inthlauhna chu point 17 a ni ta.
Spa-Francorchamps-a intlansiakah driver tawnhriat nei ṭha an chesual nghal, lap hmasa berah Fernando Alonso, Nico Hulkenberg leh Charles Leclerc te an chesual nghal a, lap khat pawh tlan chhuak loin an tawp.
Intlansiak boruak sang leh hautak tak karah Vettel-a'n hma a rawn hruai nawlh a, Red Bull driver hlui hi a tawp thlengin hmalam panin a tlan ding ngar ngar - Mercedes driver Hamilton-a'n thlah fal duh lo mah se tlan pelhna kawng a inhawng tawh lo.
Driver beisei awm Max Verstappen chuan Red Bull tan hna ṭha taka thawkin pathumna dinhmun a luah a, hremna tawh vanga 17-na aṭanga bul ṭantu Valtteri Bottas chu palina a ni thung.
Tun hnaia racing track pawn lama buaina nei Force India an chefuh tlat thung; Sergio Perez-a'n team lian dangte umphak chiah lo mah se pangana a ni phak a, a hnung chiahah hian a teammate Esteban Ocon a thleng bawk.
Hnehna changtu Sebastian Vettel chuan, "Bul ka ṭan fuh a, a tir lamah khan Lewis khan min um na hle. Season hmasa khan tun ang hunah hian kan talbuai a, kuminah chuan inelna ṭha zawkin kan zawh theih ka beisei," tiin a sawi a, season hmasa chawhnu lama an chet zuih tawhna ang kha thlen nawn tir a tum lo.
Championship hmahruai mektu Lewis Hamilton chuan, "Seb-a ka lawmpui che, hnehna chan tumin ka theihna zawng zawng ka hmang a ni. Ferrari hian car ṭha tak an nei a, kan tan pawh el an hautak dawn hle. Mahse, season hmasa lama kan tih angin a tawp thengin kan bei ang," a ti.
Formula 1 season kal laiah intlansiak vawi 21 a awm dawn a, heng zingah 13 chu an tlan tawh. Grand Prix 14-na ni turin September 1 zan hian Italian Grand Prix an tlan leh ang.
Belgian Grand Prix Results
# Driver Ram Team
1 Sebastian Vettel Ger Ferrari
2 Lewis Hamilton Gbr Mercedes
3 Max Verstappen Hol Red Bull
4 Valtteri Bottas Fin Mercedes
5 Sergio Perez Mex Force India
6 Esteban Ocon Fra Force India
7 Romain Grosjean Fra Haas
8 Kevin Magnussen Den Haas
9 Pierre Gasly Fra Toro Rosso
10 Marcus Ericsson Swe Sauber
Driver Championship Table
# Driver Ram Team Points
1 Lewis Hamilton Gbr Mercedes 231
2 Sebastian Vettel Ger Ferrari 214
3 Kimi Raikkonen Fin Ferrari 146
4 Valtteri Bottas Fin Mercedes 144
5 Max Verstappen Ned Red Bull 120
6 Daniel Ricciardo Aus Red Bull 118
7 Nico Hulkenberg Ger Renault 52
8 Kevin Magnussen Den Haas 49
9 Fernando Alonso Spa McLaren 44
10 Sergio Perez Mex Force India 40