Reus-a'n goal 100-na a khung

Borussia Dortmund captain Marco Reus chuan Pathianni zan khan RB Leipzig lamah Bundesliga bika a goal 100-na a khung. Signal Iduna Park-ah mikhual Leipzig-in Jean-Kevin Augustin hmangin minute khatna lekah goal khung nghal mah se Dortmund-in goal liin an chhang let a, 4-1 in an chak.

Dortmund tan hian Mahmoud Dahoud-a'n minute 21-naah an siphurh a sut a, Leipzig midfielder Marcel Sabitzer chuan minute 40-naah an lamah a tilut. First half tawp hma minute hnih la awmin Axel Witsel chuan goal mawi a khung a, second half-ah goal lut lawk loin injury time-ah Reus-a'n chak nemnghehna goal a khung.

Puang hma hret

First half-ah Marco Reus freekick aṭanga ball kal chu goal-ah a lut a, stadium announcer Nobby Dickel chuan Dortmund captain-in Bundesliga goal 100-na a khung thu a puang. Amaherawhchu he goal hi Leipzig midfielder Sabitzer own goal a nih avangin Dortmund lawm a kim lo.

Reus-a'n goal 100-na khung turin match dang a nghah a ṭul dawn niin a lan hnuah player talent nei ṭha hian counter attack hmanga an attack hnuhnung berah league goal century chu injury time-ah a khung ta tho.

Witsel-a goal mawi

Kum 29 mi Axel Witsel chuan Chinese club Tianjin Quanjian aṭangin Borussia a pan a, Belgian midfielder hian DFB Pokal-ah Dortmund tana a match hmasa ber a khel. 2. Bundesliga club SpVgg Greuther Fürth an hmachhawn ṭumin injury time-ah siphurh sutna goal a khung a, extra time-ah an chak zui bawk.

Witsel hian Bundesliga a khelh hmasa berah pawh goal khung lehin goal mawi bik a ni a, boruak ball kang chu a bicycle kick lut. Belgian midfielder chuan, "Hetiang goal ang hi ka club hlui Liege leh Benfica bakah Chinese club leh national team tan ka khung tawh. Chutihrualin Dortmund khelmuala mualneitu nichunga khung erawh a danglam takzet a ni," tiin a club thar nuam a tih thu a sawi.