India U16-in Besiktas hneh

September-a AFC Under 16 Championship khel tura inbuatsaih India U16 chuan Turkish club ṭha Besiktas rawlthar rual chu 5-1 ngawtin an sawp a, AFC U16 a tan beiseina a sang zel.

Blue Tigers U16 tan hian Vikram Pratap Singh chuan hattrick a siam a, Rohit Danu leh Bhuvensh ten goal khat ve ve an khung ve bawk.

Malaysia-a neih tur AFC U16-ah hian India hi Group C-ah Iran, Vietnam leh Indonesia te nen an awm ho dawn a, WAFF U16 Championship-ah AFC U16 champion lai Iraq te hial hneha pahnihna an nih bawk avangin beiseina an nei sang hle.

India U16-ah hian Serchhip midfielder Eric Remruatpuia Chhangte, Lunglei goalkeeper Lalbiakhlua Jongte, Lengpui midfielder Lalrokima leh Armed Veng rawlthar Lalchhanhima Sailo te an awm.