MPL7 Thlirlawkna ; Champion theihna apianga champion Chhinga Veng

Mizoram Premier League Season 7 chu September 6 hian Lammualah khelh ṭan a ni dawn a, nomawi inchuh tur team riat zingah Chhinga Veng an la langsar ber. Chhingcows hian season liam ta khan MFA hnuaia nomawi chawi theih pathum MFA Super Cup, I Day Football leh Mizoram Premier League-ah an champion vek a, tun season-ah a hmasa pahnihah an champion leh tawh a, a hlu ber MPL-ah nomawi chawi nawn ngei an tum ang.

Coach ngai Sanga

Tualchhung football-a Chhinga Veng vawrh sangtu chu Lalsangzuala Hmar a ni a, Melthum pa hnuaia an record hi chhuantham a tling.

Sanga hian MPL5-ah Chanmari FC a champion pui a, chona thar hmachhawn turin Chhinga Veng a pan. Chhingcows lamin Mizorama coach taima ber an neih hi hlawhtlinna a chan theih nan a player duh ang an laksak a, an sum hman tamna hi taimakna leh remhriatna nen hlawhtlinna an chanpui. Coaching staff, club board leh veng mipui thawhhona a ṭha hle.

Tun season-ah Chhinga Vengin an player ṭhahnem tak an chan a, chutihrualin champion nawn turin an la ṭha tawk tih lantir nan MFA Super Cup leh I Day Football nomawi an chawi tawh. Sanga hi amah ang bawka taima leh tualchhung football hrechiang Lalremruata'n a ṭawiawm a, an naupang chher ṭhenkhat an rawn puitlin chhoh tawh bawk avangin an thawhrah a lang chho mek.

Sanga hi coach zinga MPL nomawi vawi hnih chawi hmasa ber a ni a, club hrang pahnih champion pui hmasa ber a ni a, tun ṭumah hian club ngai a zawna champion pui hmasa ber nih a tum dawn a ni.

Tlarhnung an zia

MPL keeper zinga tawnhriat nei ṭha ber zinga mi Zothanmawia an kawl a, College Veng tlangval T. Mawia hi tlarhnung tiphuitu ber pakhat a ni a. Chhingcows hian T. Mawia thachhang dawl turin Lalmuansanga an kawl a, Bethlehem Vengthlang tlangval hi a theihna thlirin first keeper tlak a ni bawk.

Defence laiah season liam taa an player zingah K. Lalthlahlova chiah chelh mah se BVT aṭangin PC Laldinpuia an lalut a, Assam lama tawnhriat nei ṭha Vanlalzuidika an lakluh theih bawk avangin an chak lohna lai tura ngaih hi an ṭhatna zingah an chhiar tawh.

Mualsirah Vanlalchhuanga leh Hmingthanmawia te chu an rinrawl an ni a, tlarhnung sir tichak turin player an lak belh a nih pawhin a mak lo ang.

Midfield an ṭha

Midfield-ah player langsar an kawl hnem a; Lalrinchhana, Jacob Lalrawngbawla, F. Zosangliana, Lalmuansanga, Lalmawizuala leh Lalchhuanpuia te chu team tichak thei vek tur an ni a. Chutihrualin R. Malsawmtluanga hmunruak luah khat erawh a harsa ang.

Heng bakah hian tlarhma leh midfield-a chhawr theih Lalromawia leh Lalsawmzela te an kawl a, mual sir aṭanga nawr turin F. Lalnuntluanga leh Ramhlun South winger Lalremruata te an awm bawk. Rawlthar duhawm C. Beithatlo pawh a dam ṭha a nih chuan tun season-ah minute engemaw zat chu a neih theih a beiseiawm.

Dawngtea hoin

MPL ṭantirha forward ṭha ber zinga mi MS Dawngliana chu season liam ta khan beisei a phak tawk lo a, tun season-ah rinrawl ni chho lehin a vanglai a hmang nawn leh mek tiin a sawi theih. Dawngtea bakah hian hmabak nei êng pahnih Lalrammuanpuia leh Tuikual North striker Lalremruata te an nei bawk.

Lalrammawia hming a sawi hmaih theih lo a, Sanga hian player tharum ngah ṭha tak hi a hman thiam avangin a kalna apiangah a hruai zel tiin a sawi theih. Rammawia hi goalkeeper leh midfield lai tih loah chuan player vantlang chunglam vek a ni a, a khelh ṭhat ṭumah chuan danglamna thlentu a ni.

CHHINGA VENG FC
# Hming Nickname Position Permanent Address
1 Zothanmawia T. Mawia Goalkeeper College Veng
2 Lalmuansanga Muansanga Goalkeeper Bethlehem Vengthlang
3 K. Lalthlahlova Patea Central Defender Champhai Zotlang
4 PC Laldinpuia Dinpuia Central Defender Samthang
5 Vanlalzuidika Zuia Central Pukpui, Lunglei
6 Vanlalchhuanga Chhuanga Right Back Chhinga Veng
7 Hmingthanmawia Hmingtea Left Back Bethlehem Vengthlang
8 Lalthathanga Thanga Right Back/Winger Langza, Churachanpur
9 Lalthlamuana Thlamuana Winger/Wing back Chhinga Veng
10 Lalchhuanpuia Chhuanpuia Midfielder Vaphai
11 Lalmawizuala Ashtea Midfielder Bethlehem Vengthlang
12 Lalmuansanga Muansanga Midfielder W. Phaileng
13 F. Zosangliana Sanga Midfielder Tlangsam
14 Isaac Lalremruata Isaac Midfielder Chhinga Veng
15 Jacob Lalrawngbawla Jacob Midfielder Tlungvel
16 C. Beithatlo Alunga Attacking Midfielder Chhinga Veng
17 F. Lalnuntluanga Tluanga Winger Chhinga Veng
18 Lalrinchhana Rinchhana Central Midfielder Electric Veng
19 Lalromawia Romawia Forward/Midfielder Samlukhai
20 Lalsawmzela Sawmzela Forward/Midfielder Chhinga Veng
21 T. Shalomlala Shalom-a Winger Chhinga Veng
22 Lalremruata Remruata Winger Ramhlun South
23 Lalrammuanpuia Apuia Forward Armed Veng South
24 MS Dawngliana Dawngtea Forward Bawngkawn
25 Lalremruata Remruata Striker Tuikual North
26 Lalrammawia Rammawia Utility Sawleng.