SAFF Cup khel turin India inbuatsaih

Bangladesh-a SAFF Championship khel tura inbuatsaih India chuan Australia-ah hun an hmang mek a, vawiin tlai dar 3:30 hian A League club ṭha Sydney FC nen friendly match an khel dawn.

Sydney FC hi season hmasa khan Australia-a football league sang ber A League-ah an champion a, anmahni hnaih bertu Newcastle Jets aiin point 14 ngawtin an sang zawk.

India coach Stephen Constantine chuan, "Sydney FC hi A League champion lai an nih mai bakah tun hnai kum thum chhunga A League club ṭha ber pawl an ni a, kan tan chuan in enchhinnna ṭha tak a ni dawn a ni," a ti.

India squad hian New Delhi-ah ni 20 zet training an neih hnuin August 17 khan Australia hi training neih chhunzawm turin an pan a ni. India hian Australia-a an friendly match hmasa berah APIA Leichhardt Tigers FC U20 chu 3-1 in an sawp tawh.

Tun ṭuma Blue Tigers squad-ah hian player langsar Sunil Chhetri leh Jeje Lalpekhlua te ho koh an ni lo a, naupang rual hruai niin Mizo panga Lalruatthara, Jerry Larinzuala, Isaac Vanmalsawma, Lallianzuala Chhangte leh Daniel Lahlimpuia te chu hruai zingah an tel.

SAFF Cup-ah hian India hi Group B-ah Sri Lanka leh Maldives te nen awmhoin Group A-ah Bangladesh, Bhutan, Nepal leh Pakistan te nen an awm ho a, group-a a sang zawk pahnihin semifinal an lut ang.