Saina tawpna bronze; final-ah Sindhu

Olympic silver medallist PV Sindhu chuan a vawi khat nan Asian Games-ah gold medal la turin kawng dik a zawh, nimin khan final a in vaw kai; a chhe berah silver a dawng dawn tih a chiang - Indian shuttler pakhat zawk Saina Nehwal erawhin semifinal a paltlang zo lo a, bronze medal chu a tawpna a ni.

Vawiin hian hmeichhe singles hmawr bawkna neih nghal tur a ni a, Saina hnehtu Tai Tzu Ying leh Sindhu te an intawng dawn. World number 3 Sindhu tan mellung pawimawh phun tura hun ṭha a nih bakah, a hnampui Saina tana phuba laksak theihna tur remchang a ni ang.

History

London Olympic-a bronze medal la tawh Saina hian tun hnaia a hneh theih loh Tai Tzu Ying lakah a ze ngai a la paih thei lo, world number 10 hi minute 32 chhungin 17-21, 14-21 in a chak lo - world number 1 Tzu Ying lakah hian a zawnin vawi 10 zet a tlawmna a ni.

Kum 28 mi Saina hi chak lo mah se a sulhnu hi sawi nep theih a ni lo. India nula zinga badminton huanga Asian Games medal la thei hmasa ber a ni a, kum 36 zet hnuah India-in Asiad-ah hian singles huangah medal a la leh chiah.

Syed Modi chuan 1982 khan Asian Games hi New Delhi-a neih a nih ṭumin bronze medal a la tawh a, ani hnuah singles bika medal la thei an la awm leh ngai lo. Saina leh Sindhu te hian a sulhnu an zui ve leh chiah.

Inkhel dangah world number 3 Sindhu leh Akane Yamaguchi te an inbei tawk hle a, darkar khat leh minute nga hnuah Sindhu-i'n 21-17, 15-21, 21-10 in hnehna a chang, Indian shuttler hian point hnuhnung ber hmu tur hian 50-shot rally an neih hnuah point hlu bik a hmu.

Kum 23 mi Sindhu hian Tzu Ying a hneh a nih chuan, Asian Games badminton mimal inelna bika India-in gold a vuak chhuah theih hmasa ber a ni ang. Tun hnaia final a khelh ho a chak lo thei tak Sindhu tan fiahna a ni dawn a, hnehna a chang thei a nih chuan Rio Olympic ang bawkin a thlen chin hi India tan record thar a ni zel ang.

India chak chiang

Nimin vek khan India hmeichhe hockey team chuan pool match an khel a, semifinal lut chiang tawh mah se goal khung an bansan thei lo. India nulate hian Thailand 5-0 in an sawp a, Mizo nula Lalremsiami Hmar chu inlan mah se ni dang angin a vannei tawk lo a, goal a khung lo.

India tan captain Rani Rampal chuan hattrick a siam a, ani bakah hian Goyal leh Monika ten goal khat ve ve an thawh bawk. India hian an match hmasa lamah Indonesia (8-0), Kazakhstan (21-0) leh South Korea (4-1) te chu an sawp vek tawh a, semifinal an thlen avangin bronze an dawng phak tawh - world number 9 India hi Asian Games khel zinga ranking sang ber an ni a, champion tura rinkai ber an ni bawk.