Fulham chakna Mitrovic

Premier League kai thar Fulham chuan a vawi khat nan chak ni hmel an hmu ta, striker Aleksandar Mitrovic goal hnih hmangin Burnley chu 4-2 in an hneh a, league match thum aṭangin point thum an nei.

Slavisa Jokanovic-a nauten a tir aṭangin inkhel an thunun a, minute lina lekah Jean Michael Seri-a'n goal khungin, Mitrovic goal hnih bakah Schurrle goal in a zui - mikhual tan Jeff Hendrick leh James Tarkowski ten an khung ve bawk.

Mitrovic hian February thla khan loan hmangin Fulham hi a zawm a, nipui bazar lai khan an la nghet zui. English club tan hian league goal 15 a khung der tawh a, Premier League match thumah goal thum a khung.

Fulham manager Slavisa Jokanovic chuan, "Goal li kan khung a, na takin kan khingpuite kan nawr bawk. Kan tan chuan hmasawnna duhawm tak a ni a, kawng tam takah lawmna hmuh tur a tam hle," tiin a sawi.

Burnley tan chanchin lawmawm loh a inzawm, kar hmasa khan Watford lakah 3-1 in an tlawm a, Europa League playoff-ah Olympiakos an hneh lo zui bawk; Fulham laka an tlawm leh avangin Sean Dyche-a nute tan insiamṭhat a ngai, Ningani zana Greece club nen playoff an khelh leh dawn bakah Pathianni zanah Manchester United nen an intawng ang.