3 Tottenham laka United goal chhuah zat ; Mourinho Premier League nomawi chawi zat; Old Trafford-a season thum a awmna
Manchester United-in Jose Mourinho hnuaia season thumna anchhia an pumpelh bik dawn lo niin a lang, match hmasa pathumah point thum chauh an hlawh chhuak.
Thawhṭanni zan khan an kulhpui Old Trafford chu Tottenham Hotspurs-in Harry Kane goal hmahruai leh Lucas Moura goal hnih hmangin 3-0 in an luhchhuah.
Mourinho a buai!
Jose Mourinho-a'n goal venhim chu thupui berah a nei ṭhin a, tunah erawh pressure nasa tak avangin a dun dan ang thlapin team a rem tawh lo niin a lang.
Spurs an mikhual ṭumin Mourinho nauten attacking game nen bul an ṭan a, an khingpui defender ten nuam saa ball an inpek loh nan pressure an pe ṭha hle.
Man United-in bul an ṭha a, Romelu Lukaku chuan Danny Rose back pass sual chu nang fuhin keeper Hugo Lloris a tlan pelh hnuah goal ruakah a khung lo.
Mourinho hote an hmuhnawm zui a, vei lam kilah Luke Shaw a hlauhawm a, French midfielder Paul Pogba leh Brazilian midfielder Fred ten Spurs tlarhnung an rum ṭhaih bawk.
Amaherawhchu, Portuguese manager game plan a famkim lo a, tlarhnung a phui tawk lo. Nemanja Matic tihsual vangin Delle Alli-a'n chance ṭha a nei a, English midfielder hian chance ṭha dang a hlah bawk.
Goal thum chu
Minute 50-naah Kieran Trippier corner pet chu Harry Kane-a'n a tauh lut a, England captain hian goal a khung theih loh thla August-ah goal hnih a khung ta. Tottenham-in Lucas Moura hmangin minute hnih hnuah an hmahruaina an belhchhah a, Christian Eriksen-a ball pek chu PSG midfielder hian a pet goal nghal.
Goal hnih an chhuahnaa mahni chan veng hneh lo pahnih Phil Jones leh Ander Herrera aiah Victor Lindelof leh Alexis Sanchez te luhtir a ni a, amaherawhchu Jesse Lingard-a'n chance ṭha bik a hlah avangin United tan thochhuah a harsa tawh.
Spurs an tlangnel tulh tulh a, United vanneihna erawh Delle Alli vanneih zan a ni lo a, English midfielder hian Lindelof back pass sual aṭanga a chance hmuh chu keeper David de Gea chauh a hmachhawn hnuah a khung lo. A tawpah team boruak ṭha zawk Spurs tan Lucas Moura a inlar leh a, Brazilian midfielder hian Chris Smalling chiang taka a bum hnuah chak nemnghehna goal a khung.
2-na leh 13-na
Tottenham-in Pochettino hnuaiah Old Trafford-ah ṭum thum 1-0 veka an chak loh hnuah hnehna an chang ve ta a, hemi hma hian Newcastle leh Fulham an hneh bawk avangin match thumah point kua an hmu. Spurs-in pahnihna dinhmun an luah a, an chunga awm Liverpool chu goal difference-ah chiah an tluk lo.
Manchester United erawhin Leicester City an hneh hnuah Brighton & Hove Albion leh Spurs lakah an tlawm avangin match thumah point thum an hlawh chhuak a, table-ah 13-naah an awm.