Egyptian FA chungah Salah lawm lo

Mohamed Salah chuan Egyptian Football Association chunga a lawm lohna twitter kaltlangin a puang chhuak a, Liverpool forward hi a phalna loa fakna thila a thlalak hman chungchanga lungni lo a ni.

April khan Egypt official team sponsor tu WE chuan Salah thlalak hi in fak nan an hmang a, kum 26 mi forward hian WE-in telecommunications lama a elpui ber Vodafone-ah contract a neih bawk si avangin WE-in a thlalak an hmang ngawt hi a lungawi lo.

Salah chuan, "Kei leh ka ukil tena Egyptian FA hnena lehkha kan thawn chuan ngaihsak a hlawh lo. Engvanga kan lehkha hi tun thlenga chhan la ni lo nge ka hre lo a, hun in nei ngah tawk lo em ni? Football Association chuan an team buaina chu an ngaihtuah tur a ni a, keimahniah chuan a ni si lo," tiin a lungawi lo hle.

Ramy Abbas, Salah-a ukil chuan, "Special bik taka enkawlna dil kan ni lo a, national team-a a awm lai khan a thlalak hi hmang lo turin kan dil daih tawh bawk. Mahse, min la chhang lo a ni," a ti.

2019 Africa Cup of Nations qualifier-ah Egypt hian Niger chu September 8 khian an hmachhawn dawn a, Salah chuan ram tana inkhelh a tum lo niin an sawi. Mahse, EFA thupuangtu chuan he thuthang hi a dik loh thu a sawi ve thung.