September 6 aṭangin MPL7

Mizoram Premier League Season 7 chu September 6, 2018 aṭangin khelh tan a ni dawn.

MPL7 khuhhawnna 'MPL Kickoff' chu August 31 zanah Chanmari YMA Hall-ah neih a ni ang.

MPL7-ah hian club pariat - Aizawl FC, Bethlehem Vengthlang FC, Chanmari FC, Chawnpui FC, Chhinga Veng FC Electric Veng FC, Mizoram Police leh Ramhlun North FC-te an inel dawn a ni.

Team pariatte hi vawi hnih ṭheuh an inkhel kual chhuak dawn a, a hniam ber chu MPL aṭangin an tla (relegate) ang a, aa tawpah a sang paliin semi final an khel ang. Semi final hi double leg-a khelh a ni dawn a, chutah final (single leg) khelh zui a ni ang. Final hi December 7-a khelh tura ruahman a ni.

MPL hi Lammuala khelh tur a ni a, round pakhat hi Aizawl pawna khelh turin MPL Board chuan a rel a, a khelhna hmun leh hun hi tihchian a la ni lo.

Lammuala inkhel hi tlai lam dar 2:00-ah leh zan dar 7:00-ah khelh thin tur a ni ang.

Inkhel en man hi Rs 30 a ni ang a, semifinal-ah Rs 50 niin final-ah Rs 100 a ni ang. Sikul naupang uniform hate leh kum upa lam kum 65 chin chung lam chu a thlawna inkhel en phalsak an ni thung ang.

Under 18 lam
Mizoram Premier League Under 18 chu October chawhnu lama khelh tura ruahman a ni.

MPL Under 18 (tun hmain Under 17) atang hian player ṭha tak tak, ISL leh India team-a khel phak hialte an lo chawr chhuak tawh a ni.