South Korea fapa Son

South Korea-in dan khauh tak a nei a, chu chu mipa tawh phawt, kum 18 - 35 inkar chuan an ram sipaiah thla 18 tal hun an hmang tur a ni, tih a ni.

Tottenham Hotspur forward Son Heung-min chu he hun hmachhawn thei dinhmunah hian a ding mek a, a tana talchhuahna awm­chhun chu Asian Games chauh a ni tawh.

Asian Games football hi under 23 player tan a ni a, senior player pathumin an ho phal sak an ni. Senior player zingah Son a tel a, Asian Games-ah hian podium an lawn pha a nih hlauh chuan sipaia ṭang loin hriatthiam a ni dawn.

Vawiin chawhnu dar 2:30-ah South Korea hian Vietnam nen semifinal an khel dawn a, Son leh a ṭhianten an football career tih khawtlai an duh lo a nih chuan an tih ngei ngei tur chu hnehna chan a ni mai! Semifinal lehlamah zanin dar 6 hian Japan leh UAE an inkhel bawk ang.

A harsa dawn...

Son leh a ṭhiante hian medal hawn tur an nei lo a nih chuan thla 18 ngawt sipaia ṭang turin a puanthuah a tel a ṭul dawn tihna a ni a, kar nga chhung zet chu sipai training hautak hmachhawnin a hun a hmang ang.

An ṭhenawm North Korea nena inngeih lo tak South Korea sipaia ṭang tur hian Son hian tlanchhuahna a hmu tho ang, Tottenham Hotspur an lian tawk a, Premier League-in thil an ti thei tawk bawk, tih chu mi tam tak ngaihdan a ni.

Mahse, Korea ram zirchiang leh hrechiang­tu, James Hoare, international affairs zirchiangtu Chatham House-a associate fellow ni bawk chuan, "Mi an lar zawh poh leh sipaia ṭan pumpelh tumna hi a harsa lehzual a ni.

"Khawvelah system mawng pawp lai zauh nei lo an awm kher lo ang. Mahse, Korea-a sipai tlanchhiatsan tum hi thil harsa tak a ni a, an ram mipui ten an ngai pawimawh em em bawk," a ti.

Khai mah aw...

Arsenal striker hlui Park Chu-young chu kum 2012 khan London club-a a awm lai hian sipaia ṭang tura tih a ni a, mahse AS Monaco tan a khelh laia Monaco khaw mi leh sa nihna a neih chu chhuanlama hmangin military service a neih tur chu kum 10 ngawtin a ti khawtlai.

A hunlaia kum 26 mi Park-a talchhuahna hian sawisel a hlawh a, national team

aṭangin an paih a, Seoul khawpuiah kirin press conference a ko a, an ram mipuite hnenah ngaihdam a dil hial - Park-a chet dan avang hian South Korea sorkar an khirh zual sauh.

Reality TV star leh hip-hop artist MC Mong chuan 2010 khan a sipai ṭang peih lo lutuk chu ha doctor (dentist) hnenah a ha ṭha pahnih a phawi tir a, a hnuah manchhuah a nih leh si avangin thla ruk chhung lung in tang thei dinhmuna siam a ni!

Gangnam Style vanga hriat hlawh Psy kha ṭum hnih ngawt sipaiah ṭan tir a ni - a ṭan hmasak zawkah a pop career a lo la kalpui reng vang a ni! Baseball player Baek Cha-seung chuan American passport a neih hmachhuanin South Korea a hnuchhawn a, kuminah South Korea khual leh tui nihna neih tuma a beih lehna chu hnawl sak a ni!

Sipai leh career

Kum 2015 khan golfer Bae Sang-moon chuan USA-a awm phalna nei a nih avangin a career vanglai tawp hma chu sipaia ṭang tura hriatthiam theih a nih thu a sawi a, court-ah a zualko.

Mahse, a zualkona lam hian Bae Sang ṭanna hi an pawmpui lo a, thla 18 chhung sipaiah a ṭang. Kum 32 mi hian sipaia a ṭan hun chhung zawng hian sipaia a hun tawp hun tur chiah a ngaihtuah ṭhin thu a sawi!

Sipai aṭanga a chhuah hnuah a taksa a chak zawk thu leh rilru lamah pawh a pau­khauh zawk thu a sawi a, mahse a sawi ang hi a ni lo a ni ang - golf-ah tun hma angin result ṭha a neih chhunzawm tawh lo.

Infiammi tam takin sipaia ṭan an hreh hi a awm lo hran lo. An career a tih khawtlai bakah a hnu thlengin a ti chhe thei tih a lang tlat.

Hriatthiamna

Manchester United winger lar Park Ji-Sung kha kum 2002 World Cup-a South Korea-in semifinal an luh avang khan sipaia ṭang lo tura hriatthiamna pek zingah a tel a, squad pumpui kha awl an ni.

Newcastle United midfielder Ki Sung-yueng chuan kum 2012 khan London Olympic-ah South Korea chu bronze a hlawhchhuahpui a, he result ṭha avang hian anni pawh hi sipaia an ṭan hun chhung tur chu kar li lekah tih hniam sak an ni a, an vannei.

Ki Sung-yueng chuan, "Son nen hian Premier League player kan nih avang maia hriatthiam theih kan ni bik lo," tiin a lo sawi tawh a, a tan erawh thu sawi nuam tak a ni ang - hriatthiam zingah a tel miau a.

South Korea chauh lo pawh hi ram

ṭhenkhatin mipa tana an ram sipaia ṭan ngei ngei ngai ang hian dan an nei nual a, Liverpool forward Mohamed Salah chu Egyptian FA-in hma an lakpuina avangin an ram hian an lo hrethiam tawh.

Son bawk chu...

Kum 2014 khan Son hi Bayer Leverkusen tan a khel a, Asian Games-ah South Korea aiawha khel tura koh a ni. Mahse, German club hian Champions League match hnih khelh tur an neih avangin an chhuah phal lo.

Asian Games football-ah South Korea an champion zui a, heta squad pumpui hi sipaia ṭang lo tura hriatthiam zui an ni! Kuminah erawh Spurs-in an player dinhmun hriain a kawng an dal duh lo a, World Cup khel chau tak a nichungin an kaltir.

July thlaa Spurs-a kum nga cham tura contract ziak forward hian tunah chuan ram tana medal a hlawhchhuah chu talchhuahna awmchhun a ni tawh - Uzbekistan nen quarterfinal-a an inhmachhawn ṭumin extra time-ah penalty an hmu a, en ngam loin hnunglam a hawi hial!

Son hian sipai ṭan chungchanga zawhna a dawn ṭhin chhang duh lo mah se Rio 2016 quarterfinal-a an tlak ṭuma a mittui leh World Cup 2018-a a mittui khan zawhna chhanna tam tak a peah ngaih a ni - kar khata pound sing riat chuang hlawhtu tan kar khata pound 80 (Rs. 7,271.13) hlawh tura sipaia ṭan hi a harsa ve dawn bawk a ni!