Nadal vanneih niah

US Open khelh ṭan niah player langsar an chak nghal a, world number 1 Rafael Nadal-a'n harsa lutuk loa hnehna a chan laiin Stan Wawrinka leh Andy Murray te pawhin an khingpui hnehin second round an inhlangkai.

Nadal a vannei

Champion lai Nadal-a'n a hnampui David Ferrer lakah hnehna chang turin vanneihna a dawng tel; 6-3, 3-4 in hma a hruai laiin Ferrer hi a chawn na vangin a inkhel zui thei lo a, kum 36 mi hian a Grand Slam khelh hnuhnung berah a tum ram a thleng thei ta lo.

Ferrer hian season tharah Barcelona emaw Madrid Open emaw a khelh tur thu a sawi chiang tawh a, hetihrual hian tun ṭum US Open hi major tour­nament a khelh hnuhnung ber tur a nih thu a sawi tawh bawk.

Kum 32 mi Nadal chuan, "Ferrer hi ka ṭhianṭha tak pakhat a ni a, hun hlimawm tam tak kan tawng dun tawh. Spain tan Davis Cup kan khel dun a, French Open final-ah kan intawng tawh bawk, hliam nei chunga a hun hnuhnung a hmang hi pawi ka ti hle," tiin world number 3 hlui Ferrer chungchang a sawi.

Murray chak hram

Khel bawr na vangin Murray-a'n kum khat leh thla hnih chhung Grand Slam a khel thei lo a, Thawhṭanni zan khan a rawn kir leh chiah. Britain tlangval hian James Duckworth chu 6-7 (5-7), 6-3, 7-5, 6-3 in a hneh hram.

Kum 31 mi Murray hian second round-ah chuan seeded 31-na Fernando Verdasco a hmachhawn leh dawn. Verdasco hian Feliciano Lopez chu a lo hneh ve bawk a, world number 1 hlui Murray tan awlsam taka paltlang mai theih tur a ni bik lo ang.

Grand Slam vawi thum champion tawh Murray chuan, "Ka ṭhat dan bera khelh chhuah nghal chu ka inbeisei lo, ropui leh ṭha takin ka khel nghal lo pawh a ni thei, a pawimawh ber erawh hnehna ka chang hi a ni. Inelna lian ka khel ve leh thei ta hi ka lawm hle," tiin a sawi.

Stan a tlang

Khup hliam vangin a buai a, vawi hnih zai a tawk hial; a hliam dam hnuah pawh Stan Wawrinka-a'n a la khel ṭha tawk lo. US Open buatsaihtu lamin duhsak takin wildcard an pe a, an beiseina a ti thlawn lo, Swiss tlangval hian seeded pariatna Grigor Dimitrov chu 6-3, 6-2, 7-5 in a hneh nghal.

US Open 2016 champion hian Wimbledon first round-ah khan Dimitrov bawk hi a lo hneh tawh a, July thla a khelh grass court inelna lianah khan set a hloh hnuah a chak let a, tun

ṭumah erawh set hloh loin a tlang.

Kum 33 mi Wawrinka chuan, "He hmuna ka inkhelh hnu­hnung berah chuan nomawi ka chawi, season hnih hnuah hnehna nen ka kir leh thei hi lawmna tur hlir a ni," a ti, world number 101 hian second round-ah chuan Ugo Humbert a hmachhawn leh ang.

Inkhel dang

Nikum US Open pahnihna Kevin Anderson chu khaw­tual tlangval Ryan Harrison lakah chak lo tura a lan hnuin 7-6 (7-4), 5-7, 4-6, 6-3, 6-4 in a chak a, seeded 11-na John Isner pawhin Bradley Klahn 7-6 (7-3), 6-3, 6-4 in a hneh bawk.

Seeded pathumna leh 2009 champion ni bawk Juan Martin del Potro chuan Donald Young 6-0, 6-3, 6-4 in a hneh a, Dominic Thiem-a'n Mirza Basic 6-3, 6-1, 6-4 in a hneh bawk. Seeded kai phak dang Milos Raonic, Giles Simon leh world number 98 Jason Kubler ten hnehna an chan laiin, seeded 19-na Roberto Bautista erawh a chak lo thung.