Manu Ginobili a chawl ta

NBA team San Antonio Spurs guard Manu Ginobili chuan season 23 chhung a chamchilh tawh basketball a chawlhsan thu a puang, kum 41 mi Ginobili hi basketball player hlawhtling berte zinga mi a ni a, US tlangval ni loah chuan NBA vawi li champion leh Olympic gold medal la kawp thei awmchhun a ni.

Argentine tlangval hian 2002 khan Spurs hi a zawm a, 2003, 2005, 2007 leh 2014 khan NBA champion a nihpui. All-Star team-ah vawi hnih thlan a ni, 2008 khan Sixth Man of the Year zingah a tel bawk. Twitter hmanga a chawlh thu sawiin Ginobili chuan, "Zinkawng duhawm a ni, duhthusam piah lam ramah kan cheng," tiin a hun tawnah a lungawi thu a sawi.

Argentina aṭanga basket­ball nun bul ṭantu Ginobili hi 1999 khan Spurs hian an la a, mahse 2002 hma chuan a team hi a zawm lo - hming a chher tawhna Italy lamah hun a hmang leh phawt. 2002-03 season aṭangin NBA-ah hun a hmang ṭan a, a hnu lam chu basketball ngainatute zingah inhrilh nawn a ngai lo ang.

Basketball inelna sang leh ngaihhlut ber NBA-ah hian regular season bikah match 1,057 a khel a, playoff-ah pawh match 218 inlanin, points (14,043), assists (4,001) leh steals (1,392) tehmeuh a nei hman a ni. A chanchin an sawi apianga hmaih ngai loh tur chu Athens Olympic 2004-a an ram a champion pui kha a ni.

NBA commissioner Adam Silver chuan, "Manu Ginobili hi khawvel puma basketball chawi lartu langsar tak a ni a, player ropui leh ngaihsanawm berte zinga mi a ni. Hun rei tak chhung match hmuh­nawm leh inkhel ropui min hmuh tir avang khan a chungah kan lawm hle," tiin a sawi a, Los Angeles Lakers guard Kobe Bryant pawhin 'Player ropui, champion player' tiin a sawi ve bawk.