Usain Bolt a inkhel dawn?

Khawvela tlan chak ber record siamtu Usain Bolt-a'n intlansiak a chawlh­san hnuah footballl khelh a chak a, a suangtuah ṭhin chu a takin a thleng dawn ta niin a lang. Bolt-a'n training a neih mekna Central Coast Mariners chuan Zirtawpni hian pre season atan friendly match an khel dawn.

Mariners coach Mike Mulvey chuan, "Bolt hian theihna dangdai tak a nei a, minute eng emaw zat a khel mai thei," a ti. Jamaican sprinter ropui hi football khelmualah kan hmu ngei dawn niin a lang.

Kum 31 mi Bolt hian 100m leh 200m intlansiakah world record a chelh mek a, infiamna khawmpui lian Olympic-ah pawh gold pakua a la tawh, Jamaican team-in gold an lak pakhat erawh an zinga pakhatin damdawi hman phal loh a lo hmang tih hmuhchhuah a nih avangin an laklet sak.

Mulvey chuan sawi zawmin, "A tlan chak tih chu thil chiangsa a ni a, chutihrualin tun hma lama a la tih ngai loh kha a tih a ngaih ṭhin avangin a awlsam lo deuh. Intlansiak kar lakah khan football hi a lo khel ṭhin a, hei vang hian team kalphung tam tak erawh a hre hle thung," a ti.