Sindhu tan Silver Medal

Pusarla Venkata Sindhu-i'n a badminton thiamna hmangin India a chawimawi mek zel. Hyderabad nula hian nimin khan Asian Games neih mekah silver medal a vaw chhuak a, a thlen chin hi India tan sulhnu thar a ni zel.

World number 3 Sindhu hian gold vuak chhuah ngei tumin Tai Tzu-Ying a hmachhawn. Mahse, world number 1 Tzu-Ying lakah Indian nula a che hlei thei lo, tihsual a ngah bakah ni danga a defending ṭha tak ṭhin chu hmuh tur a tam lo; Chinese Taipei star lakah hian minute 34 chhungin 13-21, 16-21 in a chak lo.

Hmeichhe badminton inelna huangah hian India nula pahnih Saina Nehwal leh PV Sindhu te semifinal an thleng a, London Olympic bronze medalist Saina-i'n final lut zo ve lo mah se bronze a lak kha India hmeichhia ten Asian Games singles bika medal an lak hmasak ber a ni - Sindhu hian siver lain rahbi thar duhawm zawk a rawn siam leh nghal a ni.

Silver Medal

Kum 23 mi Sindhu hian nomawi tam tak a chawi tawh a, final a khelh zat pawh a tam tawh. Tun season chhungin inelna lian pathumah final a khel ta, mahse a chak lo zawkah a ṭang vek. Asian Games hma khan Commonwealth Games leh World Championship final-ah Carolina Marin a ngam lo.

Kum 2016 khan Rio Olympic-ah Sindhu hian final a thleng bawk a, amaherawhchu Brazil khawpuiah pawh hian Marin bawk ngam loin silver medal-ah a lungawi a ṭul. Final a khelh chinah hian champion vek ni se a ropuina a zual dawn, chutih rualin a thlen chin pawh hi sawi nep theih a ni chuang lo - sum lakluh hnem lamah phei chuan badminton star zingah amah tluk an awm lo.

Asian Games-ah pawh a match hmasa lamah chuan Sindhu hi a khel ṭha thei hle a, a khingpuite tan hun ṭha a siamsak ngai meuh lo. Mahse, tun hma lama vawi kua ngawt a hneh tawh loh Tai Tzu Ying lakah a hlauthawng tih a hmuh theih a, India nula chhuanvawr hian ropuina sang zawk tawng baw tur chuan huaisenna leh inrintawkna a mamawh.

Medal dang

India mipa table tennis team chuan semifinal lut mah se South Korea 3-0 in an ngam lo a, bronze medal-ah an lungawi a ṭul. Pathumna ni mah se India tan chanchin lawmawm a ni tho, Asian Games TT huanga medal an lak hmasak ber a ni.

Archery mipa leh hmeichhe team pawhin gold beisei viau mah se South Korea bawk an tluk lo a, silver medal chu an tawpna a ni. Nimin tlai thleng kha chuan India hian a pumpuiah medal 43 lain, heng zinga pariat chu gold a ni; table-ah pakuana dinhmun an luah mek.

Asian Games 2018 Medal Table
# Ram Gold Silver Bronze Total
1 China 88 62 43 193
2 Japan 43 37 57 137
3 South Korea 31 37 44 112
4 Indonesia 23 17 28 68
5 Iran 17 15 15 47
6 Chinese Taipei 12 13 19 44
7 North Korea 12 6 7 25
8 Thailand 9 10 33 52
9 India 8 15 20 43
10 Kazakhstan 7 8 29 44
11 Uzbekistan 6 13 12 31
12 Bahrain 6 3 3 12
13 Malaysia 4 8 7 19
14 Hong Kong 3 11 15 29
15 UAE 3 6 3 12
16 Singapore 3 4 10 17
17 Qatar 3 3 1 7
18 Mongolia 3 2 5 10
19 Philippines 3 0 12 15
20 Vietnam 2 11 13 26
21 Kyrgyzstan 2 5 9 16
22 Jordan 2 1 8 11
23 Kuwait 2 1 0 3
24 Cambodia 2 0 1 3
25 Macau 1 2 1 4
26 Lebanon 1 1 2 4
27 Iraq 1 1 0 2
28 Unified Korea 1 0 2 3
29 Laos 0 2 2 4
30 Saudi Arabia 0 2 1 3
31 Turkmenistan 0 1 2 3
32 Tajikistan 0 1 0 1
33 Pakistan 0 0 3 3
34 Myanmar 0 0 2 2
35 Afghanistan 0 0 1 1
35 Syria 0 0 1 1
Note: Table hi nimin tlai thlenga an dinhmun a ni a, inelna hi neih chhunzawm zel a nih avangin an dinhmun hi a danglam leh thei.