World number 1 Halep a tla

US Open khelh tawh ṭhinah Simona Halep chu seeded pakhatna ni chunga first round paltang zo lo hmasa ber a ni. Thawhṭanni zan khan Halep hi Kaia Kanepi lakah 6-2, 6-4 in a chak lo a, nikum ang bawkin Flushing Meadows-ah hian a match hmasa berah a tla nghal.

Service hloh

Louis Armstrong Stadium-a inkhelah Halep a khel ṭha tawk lo a, a service vawi nga ngawt a hloh, a khingpui service ṭum hnih chiah a chhuh let thei. Set hnuhnung zawkah a hnufual hnuin 4-4 nih pui thei mah se, Romanian nula hian hun pawimawhah tak service a hloh khut - tho chhuak tur a awm zui tawh lo.

Kum 26 mi Halep hi season hmasa khan first round-ah Maria Sharapova hneh loin a zin kawng a tawp nghal tawh a, French Open champion tan New York hi hmun ṭha a ni ve rih lo. 2015 khan semifinal thlengin, a hnu kumah quarterfinal a lut leh bawk - player ṭha tak ni chungin US Open final a la lut lo a ni.

Grand Slam vawi khat champion tawh Halep chuan, "Khawpui lian leh bengchheng tak a ni a, ka zia nen a in mil lo. Kei chu hmun reh leh boruak sang lo nuam ti mi ka ni, chutih rualin he hmun hi ka sawisel tihna erawh a ni lo. Tun hma pawhin ṭha takin ka khel tawh, season dangah chuan hma ka sawn pawh ka beisei," tiin a sawi.

Serena a chak

Vawi ruk a champion tawhna hmunah Serena a mikhual lo, Amercian star hian nimin zing khan a match hmasa ber khelin Magda Linette chu 6-4, 6-0 in a hneh. Serena hian nikum khan fa a neih avangin US Open hi a khel lo a, kuminah erawh champion tura rinkai a ni phak.

Kum 36 mi Serena hi tun ṭumah hian seeded 17-na pek a ni, a match hnihnaah chuan German nula Carina Witthoeft nen an intawng ang; hnehna a chang leh a nih chuan a unaunu Venus Williams nen third round-ah an intawng thei dawn a ni.

Inkhel dangah Venus Williams chuan darkar hnih leh minute 55 chhungin Svetlana Kuznetsova 6-3, 5-7, 6-3 in a hneh. Khawtual nula Venus hi wildcard pek a ni a, kum 38 mi zet ni tawh mah se a theihna a la sangin, mipui ṭan a hlawh hle.

Hmeichhe singles champion lai Sloane Stephens pawhin a match hmasa berah harsatna a tawk lo. Stephens hian Evgeniya Rodina 6-1, 7-5 in a hneh; nikum khan world number 83 ni chungin a champion thei a, US Open champion zinga ranking hniam ber hian kuminah a sulhnu ngai chhui nawn a tum ang.

Inkhel Thlirna Tawi
Halep Stats Kanepi
1 Aces 1
0 Double faults 3
66% First serve % 73%
59% Win % on 1st serve 64%
30% Win % on 2nd serve 75%
2 Break points won 5
0 Tiebreaks won 0
30 Receiving points won 18
47 Points won 60
6 Games won 12
2 Max games won in a row 5
7 Max points won in a row 5
29 Service points won 30
4 Service games won 7