Vawiin tlaiah Mizoram Vs Manipur

National Girls Football Championship semifinal-ah vawiin tlai dar 4:00 hian Mizoram leh Manipur te Duler Stadium, Goa-ah an inkhel dawn.

Semifinal pakhat zawkah Tamil Nadu leh West Bengal te an intum ang.

Mizoram hian semifinal thleng turin quarterfinal-ah comeback ropui an lantir a, extra time-ah Jharkhand chu 4-3 in an hneh. Manipur nen erawh Mizoram hian fiahna hautak zawk an hmachhawn a ṭul dawn a ni.

Nimin khan Mizoram midfielder pawimawh Bilkhawthlir tleirawl Lalthansangi chu a pa Biakchungnunga a thih a avangin a rawn haw a; Jharkhand lakah Keifang tleirawl Lalbiakdiki leh Vanbawng tleirawl K. Lalruatfeli te chu inhliam chungin a khel tluan bawk.

An khingpui tur Manipur hi hmeichhe football-ah chuan team ṭha an ni a, ball an thiam bakah India aiawha khel tawh an awm nual avangin inrintawkna an ngah a. Semifinal lut tur hian team ṭha Himchal Pradesh chu 4-1 in an hneh a, rinkai zawk an ni.