United leh Mourinho an inṭhen a ṭul?

Manchester United-in tun season-ah vawi hnih an chak tawh loh avangin match thum lekah champion thei tur zing aṭanga sawi bo an ni nghal der a, an hmelma Liverpool kal fawr vang leh Manchester City-in game nghet an neih tawh vang a ni.

United-in harsatna hmachhawn mek aṭangin chhanchhuaktu an mamawh a, Real Madrid manager hlui Zinedine Zidane pawh sawi lan hial ni mah se club hotu lam an la pha thung. Amaherawhchu, Red Devils-in result ṭha a neih chhunzawm lo a nih chuan Mourinho nena inkar hian khi mek hian chat hun a nei ang.

Portuguese manager Jose Mourinho hi a duh ang defender an laksak loh avangin a lungawi lo a, Spurs lakah goal thum an chhuah leh chiah bawk avangin a lungawi lohna hi belhchhahin a awm. Chutihrualin United hian Mourinho hi Eric Bailly leh Victor Lindelof hi an lei sak tawh a, defender pahnih thlawp tur hian Nemanja Matic leh Paul Pogba te lei sakin tun season-ah Fred an la leh bawk. Heng bakah hian season hmasa pahnihah football khawvela hming langsar dang Alexis Sánchez, Zlatan Ibrahimovic, Romelu Lukaku leh Henrikh Mkhitaryan te an laksak a, manager tam zawk tan chuan lawmna tur a ni.

Amaherawhchu, Mourinho hian a player neih sa leh lak belh aṭangin lawmna a hmu lo a, team ṭha a din thei lo. Hetihlai hian Tottenham Hotspur manager Mauricio Pochettino erawhin tun season-ah player thar a nei lo a, Chelsea manager thar Maurizio Sarri meizial man ai pawhin sum a hmang tlem zawk tiin fiamthu nan hmang mah se a neih saah a lungawi.

Spurs boss Pochettino chuan, "Ka player neih danah ka lawm a, squad ngai ka hmang nawn thei hi ka tan chuan thu lawmawm a ni. Ka player-te chhuak turin an sawi nasa a, chuvangin club pawhin theihtawp min chhuah pui. Stadium kan sa mek nachungin player chelh kawngah min pui nasa a, entirna ṭha tak chu Harry Kane a ni," tiin a player neih danah a lungawi thu a sawi tawh.

Argentine boss Poch-a hnuaiah Spurs-in Old Trafford-ah an vawi khat chakna a ni chiah a, hemi hma hian ṭum li an chak zo lo a, goal an khung lo vek bawk. Amaherawhchu tun ṭumah erawh team rilru put hmang a dik a, Old Trafford-a an tihsual nei tho mah se game-ah ngawh a nei lo. United player erawh an tihsual ṭumin player chet zui dan a dik lo a, club boruak ṭha turin team chhungah thlak danglam ngai a awm.

United hian September 2 hian Turf Moor-ah anmahni ang bawka talbuai Burnley nen an inhmachhawn dawn a, club budget inthlau tak ni mah se an inkhel tur hian ngaihven a hlawh ang.