Australian Open ; Rafael Nadal-a'n harsatna nei lo

Tennis inelna lian Australian Open 2022 chu nimin khan an khel ṭan a, champion tura rinkai Rafael Nadal-a'n a match hmasa berah buaina a tawk lo. A khingpui Marcos Giron hnehin second round a inhlangkai.

Nadal hi seeded parukna pek a ni a, mipa inelna hmachhawn zingah Australian Open champion hlui awmchhun a ni. Darkar khat leh minute 49 chhungin Giron hi 6-1, 6-4, 6-2 in a hneh, a service a hloh miah lo.

Second round-ah chuan Nadal hian Yannick Hanfmann a hmachhawn leh ang. German tlangval hian nimin khan Thanasi Kokkinakis chu 6-2, 6-3, 6-2 in a lo hneh ve bawk; ruahman dan chuan January 19, Nilainiah an inkhel ang.

Vawi 70-na
Melbourne Park hi Nadal tan chuan hmun duhthusam tia sawi tur a ni ngai lo. Kum 2009 khan nomawi a lo chawi tawh a, a bak chu hlawhtlin a la nei lo. Vawi khat chauh la champion mah se a thleng sang ṭhin, vawi 70 zet hnehna a chang tling ta chiah.

Thla nga hnua Grand Slam khel ve leh chauh Nadal chuan, "Hliam damkawr nih chuan thil hi a nih dan tur angin a ni nghal vek thei lo, zawimuanga hmasawn a ngai zawk ṭhin. Mahse, Australian Open hma khan match thum hnehna ka chang.

"Inrintawkna ka nei a, hun harsa tak ka paltlang hnua beiseina ka nei leh ta hi a lawmawm. Match 70 chak theih a lawmawm a, hmabak la awmah pawh theihtawp ka chhuah chhunzawm zel ang," a ti, a chesual viau a nih loh chuan a thlen san a rinawm.

Tun season bikah Nadal hian match li a khel tawh a, set a la hloh miah lo. Giron-a erawhin match thum khel tawhin set a la la ve miah lo thung; sulhnu an in neih ṭhat hleih bakah an theihna a insan hleih em avangin Nadal tan harsatna a awm lo.

Beiseina chu
Nadal, Roger Federer leh Novak Djokovic ten Grand Slam nomawi 20 ṭheuh an kawl mek, player pathum hian tennis an la chawlhsan lo vek. Australian Open-ah hian Nadal chauh a inlan thei a, major title la hnem ber nih theihna remchang a nei dawn.

Federer hi hliam vanga inlan lo a ni. Champion lai Djokovic erawh inlan tum, mahse vaccine a lak loh avanga thawn haw leh a ni thung. Serbian star inlan loh chhan hian titi a ti tam a, mahse thuneitu lamin dan an ken kawh miau avangin sawi nawi theih a ni lo.

Australia ram hi Nadal tan inkhelh harsatna hmun a ni ṭhin. Australian Open bakah inelna dang hrim hrimah pawh champion a harsat. Mahse, tun thla tir khan Melbourne Summer Set title a la; Australia ramah kum 13 chhunga nomawi a chawi lehna hmasa a ni hial.

Inelna lian a khelh zui a, beisei ang ngeiin a match hmasa berah chuan a khel ṭha hle. Nadal-a'n champion ngei a tum dawn a, chutih rualin kum 35 mi a nih tawh avangin tleirawl thaza rual laka fiahna paltlang tur chuan vanneih a mamawh tel ang.

Natna karah Berrettini
Nimin first round inkhel dangah Wimbledon finalist Matteo Berrettini a chak. Italian tlangval hian taksa lamah harsatna nei mah se kum 20 mi Brandon Nakashima chu 4-6, 6-2, 7-6 (7-5), 6-3 a hnehin second round a inhlangkai.

Set hnihna an khelh laiin Berrettini hian medical time out a lak a ngai. Inkhelh banah Berrettini chuan, "Ka pum a nuam lo reng, a nihna takah chuan ka rilru lamin peih mah se taksa in a tlin lo ṭep chu a ni," tiin a damloh thu a sawi.

Seeded 14-na Denis Shapovalov chuan inkhel inhnehtawk takah Laslo Djere 7-6 (7-3), 6-4, 3-6, 7-6 (7-3) in a hneh a, match hmuhnawm takah seeded 10-na Hubert Hurkacz pawhin 6-2, 7-6 (7-3), 6-7 (5-7), 6-3 in Egor Gerasimov a hneh ve bawk.

Season bul ṭan fuh Gael Monfils pawh a chak nghal. France tlangval hian Federico Coria chu 6-1, 6-1, 6-3 in a sawp, set thum an khelh chhungin dinhmun hniam a nei lo. Carlos Alcaraz pawhin set hloh loin Alejandro Tabilo chu 6-2, 6-2, 6-3 in a hneh.

Mangṭha Djokovic
Australian Open champion lai Novak Djokovic chu inelna neih ṭan dawn zanah Australia aṭangin Dubai panin a thlawk chhuak. Serbian star hian vaccine a lak miau loh avangin vawi kua a champion tawhna chu a mangṭha a ngai.

Visa hnuh letsak a nih danah hian kum thum chhung Australia rama lut thei lo tura hrem theih a ni. Hremna erawh an tih nepsak dawn niin a lang, nimin khan Australian prime minister Scott Morrison chuan a rei a rin loh thu a sawi chhuak.

Morrison chuan, "Kum thum hrem theih a ni a, mahse thil engkim dan ang thlapa tih a nih a, inbiakna ṭha tak a awm a nih chuan hun rei lote chhung pawh a ni thei," tiin a sawi a, kawng an hawnsak leh a nih pawhin a mak lo ang.