Liverpool-in beisei an la nei e!

Pathianni zan Premier League inkhelah Liverpool chuan 3-0 in Brentford an hneh a, Liverpool manager Jurgen Klopp chuan champion tura an theihna zawng zawng an hlan tur thu a sawi zui.

Reds tan Fabinho, Alex Oxlade-Chamberlain leh Takumi Minamino ten goal khat ṭheuh an khung a, Brentford-in a chhanletna tur an nei lo.

Jurgen Klopp chuan, "Pawn lam mi tumah min ring turin kan ti thei lo a, kan chungah rinna an nghah duh chuan an nghat mai ang. Kan rilru ang pu mi i nih chuan nuam ti takin min en ang a, keinin kan theihna zawng zawng kan hlan ang - chumi tur chuan kan inpeih a ni," a ti.

Liverpool-in hnehna an chan avangin table-ah pahnihna an ni leh ta a, hmahruaitu Manchester City chu match khata khel tlem chungin point 11-in an phak lo mek - Klopp-a beiseina erawh a la bo lo.

Ngaihlai Salah & Mane
May 2017 hnua a vawi khat nan Mohamed Salah emaw Sadio Mane emaw tel loin Liverpool-in Premier League match bul an ṭan a, an hmatawng neih hriam pahnih tel loin an goal nawr a na tawk lo.

Reds tana chance hlauhawm hmasa ber chu Virgil van Dijk-a'n hnai set sawt aṭangin a khung lo a, Brentford keeper Alvaro Fernandez chuan a dang ṭha takzet.

Dutch defender chance neih tih loh hi chu Liverpool-in chance tia sawi theih an nei lawk lo a, beiseina nen ball thlawh lut ṭhin mah se Brentford defender, feet ruk leh inches li vela sang rual Ethan Pinnock, Pontus Janssen leh Kristoffer Ajer ten harsatna nei loin an lo dang zel.

Hetihlai hian Brentford an hlauhawm ve reng bawk a, Ivan Toney leh Vitaly Janelt te chu Reds tlarhnung tan an hnawksak - goal erawh an khung bik lo.

Danglamna Arnold
Liverpool-in an nawr hleithei lo a, mahse, Salah leh Mane tel lo pawhin danglamna thlen thei player an nei. Minute 44-naah defender thiam bik Trent Alexander-Arnold-a'n corner a pet a, heta ṭanga ball kal chu Fabinho-a'n hmahruaina goal ni turin a khung.

Reds right back duhawm Arnold hian tun season Premier League-ah match 19 khelin goal hnih a khung tawh a, assist vawi 10 a neihna a ni bawk - thilmak a thleng a nih loh chuan Premier League season khata defender assist ngah ber record a siam ngei dawn.

Arnold hian 2019-20 season khan assist vawi 13 neiin record a lo siam tawh a, hemi ṭum hian 2018-19 season-a assist vawi 12 a lo siam tawh record tho chu a khum - ama record siam amah bawkin a khum zel a ni ber!

Goal dang lut loin chawlhlawk hman a ni a, Brentford tan Bryan Mbeumo chuan si phurh sutna hun duhawm nei mah se goal khung ngeina tur nia lang aṭangin a khung thei tlat lo a, Liverpool an vannei.

A nemnghehna
Mbeumo-a'n uiawm taka chance hlahin Liverpool chungah a duhthlan vang reng ni loin zahngaihna a lantir a, Reds an harh zawk - mahse, Diogo Jota vanneih zan a ni bik lo a, post a tih per bakah a chance neih duhawm chu Fernandez chuan ṭha zetin a dansak.

Minute 69-naah Andy Robertson-a ball cross chu Alex Oxlade-Chamberlain chuan goal-ah a chantir a, mahse, English midfielder a vanduai zui.

Chamberlain hi kerek hliam vangin lakchhuah a ni a, a hmun ruaka luhtir Minamino-a'n English football a hrethiam chho ṭan tih pholangin Roberto Firmino nena ball an inpek kual hnuah a khung a, 3-0 in an chak.

Minamino hian tun season-a match 16 a khelh aṭangin goal ruk a khung ta a, January 2020-a Liverpool a pan hnua season khata goal a khung hnem ber a ni - bench aṭanga a luh tam zawk avangin minute 113 dana goal khung ang a ni phak hial.