Chelsea khingpui tur Brighton

Chelsea-in zanin dar 1:30 hian Amex Stadium-ah Brighton & Hove Albion an tlawh dawn a, Manchester City hneh lo hlim Thomas Tuchel-a hote tan insiamṭhat a ṭul ang.

Blues tan Brighton hi point thum hmuh ngeina turah ngaih theih ni mah se Seagulls hian an match hnuhnung pangaah hneh loh an tawng lo. Chu chauh chu a ni lo, an hmachhawn zingah hian Chelsea an tel.

Graham Potter hote hi nikum December 29 khan Stamford Bridge-ah Blues nen 1-1 in an inhnehtawk a, Danny Welbeck-a'n injury time-ah siphurh sutna goal a khung.

Amaherawhchu Brighton hian Premier League-ah Chelsea hi an la hneh ngai lo a, zanin an inkhelhna tur hi an mual ni mah se chak erawh a harsa ang.

Chelsea hi tun season bikah khualmuala record nei ṭha ber dawttu an ni a, match 11 aṭangin point 23 an hlawh chhuak. Mahse, khualmuala an match hnuhnung paliah vawi hnih ngawt an chak lo.

Blues-in Reece James, Ben Chilwell leh Trevor Chalobah te inhliam vangin an la chhawr thei dawn lo a, Covid-19 vangin Andreas Christensen pawh a la inlan thei dawn lo.

Thomas Tuchel erawhin Man City an hneh loh ṭum aṭangin player a siksawi ngei a rinawm a, Romelu Lukaku kianga bul ṭan tur zingah Mason Mount leh Timo Werner te an luh hmel a, Jorginho leh Kai Havertz te pawhin bul an ṭan thei bawk.