Indian Open champion Lakshya Sen

Lakshya Sen chuan Pathianni khan badminton a khelh hunchhunga a hun tawn ropui ber a tawng. Indian tlangval hian world champion Loh Kean Yew hnehin Indian Open 2022 champion a ni.

New Delhi khawpuia awm KD Jadhav Hall-a final inkhelah Lakshya hian minute 54 chhungin 24-22, 21-17 in hnehna a chang, final khelh hma chuan chak lo zawk tura ngaih ni mah se court chhungah a zam lo a, game hloh loin hnehna a chang.

Kum 20 mi Lakshya hi tun hnaiah a khel ṭha. World Championship neih zawh takah khan bronze medal a lo la tawh bawk. Tun hnaiah Covid-19 a kai nia hmuh a ni a, mahse false positive a lo ni hlauh - Indian Open a khel lo teuh hle tihna a ni.

World number 17 Lakshya chuan, "Tun hnaiah kan inkhel ngun, thla ruk chhunga vawi li kan intawnna a ni. Player ṭha tak ka hneh thei hi ka lawm, chumi rual chiah chuan mahni ram ngeia hlawhtlinna chan hi a hlu," a ti.

Men's doubles lamah Satwiksairaj Rankireddy leh Chirag Shetty te chuan, world champion ni lai Ahsan Mohammad leh Hendra Setiawan te ṭangdun chu 21-16, 26-24 a hnehin nomawi hlu tak an hlawh chhuak ve bawk.

Indian Open 2022
Men's Singles
Lakshya Sen bt Loh Kean Yew 24-22, 21-17
Men's Doubles
Satwiksairaj Rankireddy bt Mohammad Ahsan
& Chirag Shetty & Hendra Setiawan 21-16, 26-24
Women's Singles
Busanan Ongbamrungpham bt Supinda Katethong 22-20, 19-21, 21-13
Women's Doubles
Benyapa Aimsaard bt Anastasiia Akchurina
& Nuntakarn Aimsaard & Olga Morozova 21-13, 21-5
Mixed Doubles
Hee Yong Kai Terry bt Chen Tang Jie
& Tan Wei Han & Peck Yen Wei 21-15, 21-18