Spanish Super Cup champion Real

Real Madrid a kir leh hnuah kum khat em pawh a hman hmain Carlo Ancelotti-a'n champion nomawi a chawi leh ta der a, Spanish Super Cup-ah champion nomawi a chawipui.

King Fahd International Stadium, Riyadh-a entu mipui 30,000 hmaah Barcelona pet chhuaktu Real Madrid leh Atletico Madrid ngamtu Athletic Bilbao ten champion nih an inchuh a, a tawpah 2-0 in Real an chak.

Real tan Luka Modric leh Karim Benzema ten goal khat ve ve an khung a, Atletico laka goal hnih khung thei Bilbao-in a chhanletna tur an nei lo.

Modric goal mawi
Real tan Luka Modric huan minute 38-naah goal hmahruai a khung a, he goal hi Croatian midfielder 'class' pholangtu goal a ni a, goal mawi bik a ni.

Madrid-in an duhtawk mai lo - minute 52-naah penalty an hlawh chhuak. Benzema shot chuan semifinal-a Bilbao tana goal khungtu Yeray Alvarez-a kut a fuh a, video assistant referee hmanga ennawn a nih hnuah referee-in penalty spot a kawk.

Real tan Benzema a lo pen chhuak a, French striker hian tun season-a match 27-a khelha a goal 24-na khung turin harsatna a tawk lo. Goal dang a lut zui lo a, 2-0 in Real an chak.

Vanneihna
Real-in ball chang tam zawk mah se Bilbao-in chance an nei ve reng tho a, Ancelotti naute vanneihna hmuh hmaih chi a ni lo - minute 87-naah Eder Militao chuan a kuta ball a dan luih avangin hnawhchhuah a ni a, penalty a chawi bawk.

Bilbao tan hun tlem tawh mah se penalty an chhuih luh chuan a tam zawk an nih avangin beiseina a la awm thei. Mahse, tawnhriat nei ṭha Raul Garcia pet chu Real keeper Thibaut Courtois chuan ṭha zetin a dansak a, Real-in nomawi nen Saudi an chhuahsan.

Real boss Ancelotti chuan, "Team ṭha tak Athletic kan tum a, mahse, inkhel kan thunun a, he nomawi chawi hi kan phu a ni. Ka hlim em em a, chhunzawm zel pawh kan duh. Inelna dangin min hmuah reng avangin inngaihtuah khawtlai thei erawh kan ni lo - he team ka en hian eng team pawh hmachhawn turin kan ṭha tawk a ni," tiin a sawi.