Mumbai tan a awlsam dawn lo

Indian Super League champion lai Mumbai City chuan AFC Champions League group stage-a an hmachhawn tur a chiang ta a, group B-ah UAE Pro League champion Al Jazira, season hmasa Saudi Premier League pahnihna Al Shabab leh Iraqi Premier League champion Al-Quwa Al-Jawiya te nen an awm ho.

AFC Champions League West region bik group stage match hi April 7 aṭangin khelh ṭan a ni ang a, April 27-ah match hnuhnung ber an khel ang - Covid-19 hri leng vangin inelna hi hmun khata neih tur a ni.

Mumbai hi ISL cham­pion an nih vang ni loin, hmahruaitu ni chunga league round an khar avanga AFC Champions League hi khel tur an ni - ISL champion hi playoff hmanga zawn a nih avangin champion chuan AFC Cup an khel thung.

Tun season ISL-a beisei phak lo Mumbai hi Pathianni zan khan ISL-ah inlan tur ni mah se Covid-19 vangin Kerala Blasters nena an inkhel tur ṭhulh a ni a, nizan khan Hyderabad leh Jamshedpur inkhelin, zanin dar 7:30-ah NorthEast United leh Odisha an inkhel dawn thung.