Everton-in Benitez an ban ta

Rafael Benitez chu ban a ni ta nge nge - season ṭan dawna fans duh lohna kara lakluh Benitez-a'n club neitu Farhad Moshiri beiseina a tih­hlawhtlin sak thei lo a, league match 19 hnuah a hna aṭanga chawlhtir a ni.

Spanish manager chuan, "Everton enkawl hi a awlsam dawn lo tih kan hre sa. Chona hautak kan hmaah a inchhawp tih kan hria. Mahse, Liverpool khawpui leh a mi chengte ka ngainat em avangin an sawmna kha ka pawm a, a chhunga ka luh hnuah beisei aia nasaa hna a hautakzia ka hmu a ni," a ti a, Everton buaina chu chin fel mai chi a nih loh thu a sawi.

Everton hi an league match hnuhnung 13-ah vawi khat chiah an chak a, table-ah 16-na niin relegation zone aṭanga an himna chu point ruk chauh a ni - Benitez an ban hi a mak lo.

Benitez chuan, "He hna ka zawm ni aṭang khan ka staff-te nen kan tih fo angin kan theihna zawng zawng kan hlan. Result piah lamah fan-te thinlung kan hneh tel a ngai a, mahse, sum lama club talbuaina leh player inhliamten kan hna hautak tawh sa a belhchhah a ni," a ti.

Liverpool coach hlui hian hliam vangin forward Dominic Calvert-Lewin, Richarlison leh defender Yerry Mina te chu a chhawr thei lo a, nipui transfer-ah pound maktaduai 1.7-a Demarai Gray a lalut tih loh chu player lakluh nan sum sen a nei lo.

Tun thlaah defender Vitalii Mykolenko (Dynamo Kyiv), Nathan Patterson (Rangers) leh Anwar El-Ghazi (Aston Villa, loan) a lalut hman a, Villa-ah hian Lucas Digne chu a hralh bawk.

Mahse, a duh anga a player lakluh tharte pawh a chhawr hmain Norwich City lakah 2-1 in a team a tlawmpui a, ban a ni ta. Benitez chuan, "Player inhliamte dam se, ka lakluhte chhawr thei bawk ila, kan result a ṭha ngei ang tih ka sawi ngam," a ti a, hun erawh a nei ta lo.

Benitez thlak tur hian Manchester United legend, Everton chhul chhuak Wayne Rooney leh Belgium coach Roberto Martinez te hming a ri ring viau. Rooney hi Cham­pionship lama Derby County enkawltu a ni a, a club hlui tho Manchester United-in manager thar an zawng mek tih hriat a ṭha bawk.