Hammers ngam loh Harrison

Leeds United winger Jack Harrison chuan Pathianni zan inkhelah a carreer hattrick hmasa ber a khung a, Marcelo Bielsa hoten London Stadium-ah West Ham United 3-2 in an hneh.

Premier League inkhel nung ṭha takah hian Harrison hmangin Leeds ṭum hnih hmahruaina chu West Ham-in Jarrod Bowen leh Pablo Fornals te hmangin an sut ve ve a, mikhual team tan hian Harrison-a'n chakna goal leh hattrick-na goal ni bawk chu minute 60-naah a khung.

Hattrick hero Harrison
Leeds United-in nung takin bul an ṭan a, Mateusz Klich-a ball pet chu keeper Lukasz Fabianski-a'n dang mah se hemi per aṭanga ball kal zel hi Harrison-a'n ṭha takin a khung. Hammers-in bul an ṭan ṭha tawk lo a, match hnuhnung bera goal hnih khungtu Jarrod Bowen tauh luh hmangin minute 33-naah siphurh an sut tho.

Kum 25 mi Harrison-a goal hmaah a vannei a, minute 37-naah corner aṭanga ball kal chu Luke Ayling-a'n tauh fuhin English winger Harrison-a'n a su lut. Second half-ah Pablo Fornals-a'n class zetin minute 52-naah Hammers siphurh a sut a, inkhel a nung hle.

Leeds United an khel ṭha a, minute 60-naah Raphinha ball pek chu Harrison-a'n cool takin hattrick siam nan a hmang. Brazilian winger Raphinha erawh a vanduai a, freekick aṭangin goal ban a pet per. Mateusz Klich-a'n chak nemnghehna goal a khungah a inngai a, VAR hmanga pawm a nih hnuah sawisel hlawh takin offside vangin an hnawl.

Hun tawp dawn hnaiah West Ham-in Jarrod Bowen hmangin siphurh sutna remchang an nei a, English forward Bowen a vannei ta bik lo. London Stadium-ah mikhual Leeds United-in 3-2 in hnehna an chang.

Eng nge an sawi?
Leeds boss Marcelo Bielsa chuan, "Premier League inkhel niawm reng a ni a, a vannei zawka kan ṭang kha a lawmawm. Player-ten theihtawp an chhuah vanga chak kan ni a, chak duhna kha an nei lian em em a ni," tiin a sawi.

West Ham-in kar laihawlah Norwich an hmachhawn a, Leeds an awl thung. Team pahnih thahrui an inngah hleihah a ngaih theih. Hammers manager David Moyes chuan, "FA Cup zawhah Leeds kan hmachhawn a, kan intum hmain league match kan khel. Inpuahchahna hun kan nei meuh lo. Kan tihsual vang a ni a, chutihrualin mimal sawisel tur ka nei lo," tiin a insawifiah.

Hammers hi chak zo lo mah se table-ah palinaah an la awm a, amaherawhchu an hnuaia awm Arsenal, Tottenham Hotspur leh Manchester United ten khelhzat inangah an la lehpel thei thung.

Premier League
January 16, Pathianni
Liverpool 3 - 0 Brentford
LIV : Fabinho 44'; Alex Oxlade-Chamberlain 69'; Takumi Minamino 77'
West Ham United 2 - 3 Leeds United
WHU : Jarrod Bowen 33'; Pablo Fornals 52'
LEE : Jack Harrison 10', 37', 60'
Zanin Inkhel Tur
Burnley 1:00 AM Watford
Brighton 1:30 AM Chelsea
January 19, Nilaini
Leicester City 1:00 AM Tottenham
Brentford 1:30 AM Manchester United