Equatorial Guinea-in Algeria an barakhaih!
AFCON boruak a sang zel - Pathianni zan khan Equatorial Guinea chuan champion lai Algeria an barakhaih a, Esteban Obiang goal khung hmangin 1-0 in an hneh.
Equatorial Guinea-in hnehna an chan avangin last 16 luh beiseina a nung thar a, Algeria erawh match hniha point khat chiah an la neih avangin tla thei dinhmunah an ding mek thung.
Group E inkhel dangah Ivory Coast-in hnehna chan beisei mah se Sierra Leone nen 2-2 in an inhnehtawk a, match hmasa bera Algeria chelhtu Sierra Leone hian a thiam 16 zinga tel beiseina an la nei ve zel.
Tunisia chuan last 16 luh an beiseina chhi nung turin hnehna an chang ve leh ta a, Mauritania chu 4-0 ngawtin an sawp - group F inkhel dangah Gambia leh Mali chu 1-1 in an inhnehtawk bawk.
Beiseina thamral?
Match 35 chhung tlawm nei loin Algeria an kaltluang tawh a, tlawm lo rei ber Italy (37) record nih rual turin match hnih chiah an mamawh. Mahse, rin loh taka Sierra Leone lo draw tawhtu Algeria-in Equatorial Guinea lakah eng ruai an ang chuang lo.
Equatorial Guinea hian kum 2015 khan host an nihna angin AFCON an khel a, semifinal an lut. Tun ṭum hi qualifier paltlang thlap chunga AFCON an khelh hmasak ber a ni a, Algeria an hneh - an hre reng tawh ang.
Spanish third division club Antequera tana khel Esteban Obiang chuan minute 70-naah inkhela goal awmchhun khungin Algeria a barakhaih a, Manchester City forward Riyad Mahrez hoa khel Algeria-in a chhanletna tur an nei lo.
Algeria tan Islam Slimani, Youcef Belaïli leh Mahrez ten chance duhawm nei mah se an chhawr lo vek a, Baghdad Bounedjah goal khung chu offside vangin pawm a ni lo bawk - Equatorial hi vannei ang ngawta sawi erawh a rem bik lo a, Pablo Ganet leh Iván Salvador te vanneih zan ni se goal dang khung thei an ni.
Hei le Sierra Leone
Kum 1996 hnua a vawi khat nana AFCON khel Sierra Leone-in team lian lakah hlauhna an lantir duh lo a, hun pek belh minute thumnaa Alhadji Kamara goal khung hmangin Ivory Coast chu 2-2 in an inhnehtawkpui.
Ivory tan Wilfried Zaha chuan minute 12-na lekah penalty a hlawh chhuak a, mahse, AC Milan midfielder Franck Kessie-a pet chu Algeria laka man of the match lo ni tawh keeper Mohamed Nbalie Kamara chuan ṭha zetin a dansak.
Mahse, Ivory an hnual rei lo - Sebastien Haller chuan minute 25-naah goal hmahruai a khung a, Musa Noah Kamara chuan Sierra Leone tan rawn sut ve leh mah se Pepe hmangin minute 65-naah hma an hruai nawn bawk.
Ivory Coast-in an chak mai dawn emaw an inti a, mahse, Sierra Leone lamin ngaihdan dang an nei - Danish Superliga club Randers FC forward Kamara-a'n hun pek belhah si phurh a rawn sut a, last 16 luh an beiseina chu a rawn chhi nung.
Inkhel dang
Tunisia-in an match hmasa berah sawisel hlawh takin Mali chu 1-0 in an ngam lo a, he inkhelah hian referee-in vawi hnih ngawt a hun hmain inkhel a titawp! Mahse, an match hnihnaah erawh an hun tawn duhawm lo an theihnghilh ta.
Ligue 1 club Saint-Étienne attacking midfielder Wahbi Khazri chuan Tunisia tan goal hnih a khung a, Hamza Mathlouthi leh Seifeddine Jaziri ten goal khat ve ve an khung bawk.
Gambia leh Mali inkhelah team pahnihin goal khat ve ve an khung a, group F-ah point li ve ve neiin last 16 an la lut chiang thei lo.
Mali tan hun tawp nan minute 11 chiah hun a awm tawh tihah Ibrahima Kone chuan penalty hmangin goal a khung a, an chakpui mai dawna a lan laiin Musa Barrow chuan minute 90-naah a khung ve leh a, 1-1 in an inhnehtawk.