Jazz chak laiin GSW chak lo

NBA Western Confe­rence lama team ṭha Utah Jazz chuan Denver Nuggets 125-102 in an hneh a, nimin zing inkhel dangah Golden State Warriors erawh Minnesota Timberwolves lakah an tlawm thung.

Jazz tan Donovan Mitchell-a'n point 31 a nei a, point 18 a neih baka rebound vawi 19 latu Rudy Gobert a khel ṭha bawk; regular season kal laiah vawi 29 chak tling tawhin an chunga awm Warriors an hnaih tawh hle.

Golden State erawh tun hnaiah an chet fuh leh fuh loh a inzat deuh reng. Stephen Curry tel lohna GSW hi Timberwolves lakah hian 119-99 in an chak lo, vawi 12 an tlawmna a nih tak avangin Phoenix Suns an phak lo zel.