Hnehna nena bul ṭantu Osaka

Australian Open khelh a ni a, hmeichhe singles champion lai Naomi Osaka chuan harsatna nei loin hnehna a chang nghal. Nimin inkhel dangah tleirawl beiseiawm Coco Gauff erawh hneh nei loin a zinkawng a tawp nghal.

Melbourne Park-a inkhelah Osaka-i'n bul a ṭan ṭha takzet a, world number 50 Camila Osorio lakah hian set hmasa zawkah phei chuan 5-0 in hma a hruai fal thei a, a khingpuiin thapui thawh let ve mah se Japanese star hi 6-3, 6-3 in a chak tlang ta tho.

Season hmasa kha Osaka hi thla li chhung ngawt a inkhel lo, rilru lama harsatna a neih vang a ni. Tunah erawh ngai a awh chho leh tawh, a match lehpek atan chuan Madison Brengle a hmachhawn leh ang.

World number 54 Brengle hian Dayana Yastremska chu 6-1, 0-6, 5-0 in a hneh, a khingpui hi match zawh hmain hliam vangin a inhnukdawk.

Kum 24 mi Osaka chuan, "Ka hmuh thiam dan chuan ka khel ṭha ve hle, a tir aṭang khan engkim mai kha duhthusamin a kal a ni ber. Melbourne khawpui hi nuam ka ti a, a hmuna inkhel entu awm chung ngeia inkhelh hi a nuam ka ti hle," a ti.

Inkhel dangah seeded 18-na Coco Gauff chu Qiang Wang lakah 6-4, 6-2 in a chak lo. Kum 30 mi Wang hi tun hnaiah Wimbledon champion hlui Pat Cash kaihhruaina hnuaiah training a ni a, set hnihna bikah phei chuan 5-0 a kal falin buaina a tawk lo.

Australian Open vawi hnih champion tawh Victoria Azarenka chuan darkar khat leh minute nga chhung lekin Panna Udvardy 6-3, 6-1 in a hneh a, seeded 30-na Camila Giorgi pawhin Anastasia Potapova chu 6-4, 6-0 in a hneh ve bawk.

Player langsar dang Maria Sakkari, Belinda Bencic leh Elina Svitolina te an chak laiin, seeded pakuana Ons Jabeur erawh hliam vangin a khel tluan thei lo. Nuria Parrizas Diaz nen set khat an khelh zawh hnuah a inhnukdawk a ni.