Inter Milan an chelh

A zawna inelna hrang hranga match riat chak thei Inter Milan chu an chelh. Serie A champion hi an mikhualna ramah Atalanta nen goal awm loin an inhnehtawk a, league hmahruaitu erawh an la ni chhun­zawm.

Inter hian hnehna chang ni se la chuan an elpui AC Milan aiin point liin an sang zawk ang, mahse Atalanta goalkeeper Juan Musso chuan striker Edin Dzeko khung tur chu ṭha taka dansakin point khat ve vein an insem.

AC Milan chuan zanin dar 11:00 hian Spezia an mikhual dawn, hnehna an chang a nih chuan Stefano Pioli naute hian Inter tlan pelin Serie A hma an hruai lailawk ang; mahse Inter aiin match khatin an khel hnem zawk dawn a ni.

Atalanta chu palinaah an awm­chhunzawm, an chunga awm Napoli an phak lohna chu point khat a ni, an hnuaia mi Juventus aia an sanna pawh point khat chauh a nih avangin Champions League ticket inchuh boruak a nung chho dawn hle.

Inter Milan manager Simone Inzaghi aiah assistant manager Max Farris-a'n media a hmachhawn. Farris chuan, "Inzaghi a nuamsam lo a, ṭawng a harsat rih hle. Inkhel chungchang pawh ṭawngkam ni loin kan sawi dun, kan khelh danah kan lungawi," a ti.

Atalanta manager Gian Piero Gasperini chuan, "Inter hi team ṭha an nih avangin hmachhawn an awlsam lo. Kan tihsual an chang reng a, mahse keini lam pawhin tihsual kan nei duh bik lo, point insem kha thil awm tak a ni," tiin an result chu an phu tawk a nih thu a sawi ve bawk.

Italy - Serie A
Zanin Inkhel Tur
Bologna 11:00 PM Napoli
AC Milan 11:00 PM Spezia
Fiorentina 1:15 AM Genoa
January 16, Pathianni
Sassuolo 2 - 4 Verona
Venezia 1 - 1 Empoli
AS Roma 1 - 0 Cagliari
Atalanta 0 - 0 Inter Milan