Roger Federer chak awlsam

Grand Slam vawi 20 champion tawh mah se Roger Federer-a'n tournament khelh a nih chuan match hmasa ber a harsat ṭhin thu a sawi , US Open 2018-ah erawh buaina a nei lo. Swiss star hian nimin zing khan Yoshihito Nishioka hnehin second round an inhlangkai.

Flushing Meadows, New York-a champion tura rinkai ni phak Novak Djokovic pawh a chak bawk a, player naupang zawk Alexander Zverev leh Nick Kyrgios te pawhin first round paltlang turin harsatna lian tham an tawk bik lo.

Roger a class
US leh Mizoram awmna a inhlat a, khawvel letliam chiah a ni. Nimin zinga Roger Federer leh Nishioka te inkhel hi an ram lamah chuan zan a ni thung. Arthur Ashe Stadium-ah Federer hian darkar khat leh minute 52 chhung lekin 6-2, 6-2, 6-4 in hnehna a chang.

Kum 37 tling hlim Federer-a'n a ball vuak na tak chu a la dinchan pui zel, vawi 56 ngawt winners a vuak chhuah laiin, a khingpui world number 177 hian vawi 17 chauh a nei thei thung - second round-ah Benoit Paire nen an intawng dawn.

Hnehna a chan hnuah Federer chuan, "Arthur Ashe Stadium-ah i rawn lut a nih chuan, mipui mahni duh dana nun hmang mipui i hmu ang. Mahse, heng mite hi tennis vanga kal khawm an ni tih a chiang," tiin a sawi a, match hmasa ber khelh chu senior player nih tawh hnuah pawh a awl loh thu a sawi bawk.

Hmun dang aiin New York-ah hian mipui an zalen zawk emaw tih mai tur a ni a, tennis entu tam tak pawh an phawklek ṭhin - hmeichhe world number 1 Simona Halep pawhin US khawpui hi atan inkhelh harsatna hmun a nih thu a lo sawi tawh. Romanian nula hian, "Kei chu hmun reh nuam ti mi ka ni," tiin a sawi a, world number 1 hian kum hnih chhung chu first round a paltlang tawh lo.

A vawi ruk nan
Mipa tennis player hlawhtling bera chhal ngam Roger Federer-a'n US Open nomawi hi vawi nga a chawi tawh, hard court inelna lianah hian main draw vawi 18 a khel tawh, a vawi riat nan final luh a beisei mek- final a thleng thei a nih chuan a thiam pahnih zinga tel hnem lamah Pete Sampras leh Ivan Lendl te record a tluk chiah ang.

Federer-a'n 2004 leh 2009 inkar khan US Open hi a thunun hneh hle a, a zawnin match 41 ngawt hnehna a chang. Mahse, 2009 khan Juan Martin del Potro a ngam lo a, a hnuah (2015) khan final thleng leh mah se Djokovic a hneh lo leh bawk.

French Open a khelh loh hnuah Wimbledon khel mah se Federer-a'n a tum ram a thleng chuang lo, tun season chhunga Grand Slam hnuhnung berah hian a champion thei a nih chuan season thar beiseina a nei dawn a, a chak lo a nih erawh chuan a hun a liam tawh nia ngaih theih a ni dawn.

Hei le Novak
Arthur Ashe Stadium-ah 2016 final a khelh hnua a vawi khat nan Novak Djokovic a kir a, Serbian tlangval hian world number 41 Marton Fucsovics chu 6-3, 3-6, 6-4, 6-0 in a hneh. Vawi hnih a champion tawhna hmunah Djokovic hi champion tura rinkai a ni leh phak, chutih rualin tihsual a neih tlem erawh a ngai ang.

New York-ah khua a lum a, season hmasa lama hliam vanga buai Djokovic-a'n set thumna an khelh laiin minute 10 vel chawlh a mamawh hial; chawlh an neih hnuah game 10 zet a la zawn thei. Second round-ah chuan khawtual tlangval Tennys Sandgren nen an intawng dawn.

Grand Slam vawi 13 champion tawh Djokovic chuan, "A nihna takah chuan set hmasa pathumah khan ka dinhmun a ṭha tawk lo, ṭha taka ka khelh theih nan ka ṭawngṭai reng a ni," tiin khawsik vanga hatsatna a tawh thu a sawi.

Inkhel dang
Mipa singles inkhel dangah, seeded palina Alexander Zverev chuan Peter Polansky 6-2, 6-1, 6-2 in a sawp a, German tlangval hian match lehpekah Nicolas Mahut a hmachhawn dawn. Seeded pasarihna Marin Cilic a vannei, Marius Copil lakah set hnih la hmasain hma a hruai laiin a khingpui hi hliam vangin a khel zui thei lo.

Seeded 30-na Nick Kyrgios chuan Moldovan Radu Albot 7-5, 2-6, 6-4, 6-2 in a hneh a, senior player Julien Benneteau-a'n kum 36 tling tawh mah se a theihna a lantir, seeded 22-na ni phak Marco Cecchinato chu 2-6, 7-6 (7-5), 6-3, 6-4 in a hneh.

Player langsar leh chak tura rinkai an chak tlangpui, David Goffin, Robin Haase, Richard Gasquet leh Kei Nishikori ten hnehna an chan laiin, seeded 29-na Adrian Mannarino erawh 6-1, 6-1, 4-6, 6-4 in Frances Tiafoe lakah a chak lo thung.

Inkhel Thlirna Tawi
Nishioka Stats Federer
0 Aces 14
4 Double Faults 3
64/110 (58%) First Serve % In 55/82 (67%)
29/64 (45% Win % on 1st Serve 43/55 (78%)
27/46 (59%) Win % on 2nd Serve 13/27 (48%)
7/17 (41%) Net Points Won 31/45 (69%)
1/9 (11%) Break Points Won 6/15 (40%)
26/82 (32%) Receiving Points Won 54/110 (49%)
18 Winners 56
20 Unforced Errors 32
82 Total Points Won 110