Basti-a tan testimonial match

Bastian Schweinsteiger chuan nimin zing khan Bayern Munich tan a match hnuhnung ber a khel ta. Germany international hlui hi a club khelh mekna Chicago Fire leh Bayern tan a inlan kawp a, Bundesliga champion tan goal hnuhnung ber khungin 4-0 in an chak.

Kum 34 mi Schweinsteiger hian season 17 chhung zet Bayern Munich tan hun a hmang a, chumi hnuah Manchetser United a zawm. United a chhuahsan hnuin MLS club a zawm a, Chicago Fire tan a khel mek. Nimin zinga testimonial match-ah hian hun chanve hmalam chu Chicago Fire tan a khel phawt a, second half-ah erawh Bayern lamah a ṭang thung.

Bayern tana match 342 kheltu Basti chuan, "Bayern ṭantu ka ni a, fan rinawm ka ni reng bawk ang,"a ti. Pathianni hian Bavarian Order of Merit hlan a ni dawn a, Franz Beckenbauer, Gerd Muller, Sepp Maier, Lothar Matthaus leh Philipp Lahm te hnung zuiin Bayern Hall of Fame-a player lakluh 18-na a ni ang.