Mizoram an vanduai

Nimin tlaia khelh National Girls Football Championship semifinal-ah Mizoramin Manipur lakah goal khung hmasa mah se Manipur-in second half-ah siphurh an sut. Duler Stadium, Goa-ah extra time khelh a ni a, Manipur-in second half-ah bawk goal an khung a, 2-1 in hnehna an chang.

Semifinal pakhat zawkah Tamil Nadu chuan West Bengal 4-0 an hneh a, Manipur nen August 31 hian final an khel ang.

Goal 1 ve ve

Mizoram midfielder pawimawh Bilkhawthlir tleirawl Lalthansangi chu a pa thihna avangin semifinal-ah an chhawr thei lo a, hmabak harsa sa chu a harsat belh.

Inkhel inhnehtawk takah Mizoram vannei hmasain minute 22-naah Tuikual North nula Lalrinzuali'n a pet goal.

Second half-ah Manipur hun a inher chhuak a, an si phurh an sut a, 1-1 a ni.

Extra time-ah Manipur

Extratime-ah pawh an la inkhel tawk hle a; first half-ah goal a luh loh hnuin Manipur-in second half-ah chakna goal an khung.

Hun tlem te la awmah Mizoramin sût tumin theihtawp chhuah mah se an thun thei ta lo

Rahbi thar

Mizoram hian team thum awmna group H-ah Delhi 2-1 a hnehin bul an ṭan a, Rajasthan chu 16-0 in an sawp leh bawk.

Quarterfinal-ah Jharkhand chu extra time-ah 4-3 in an hneh a, India-a a thiam pali zinga telin semfinal an lut. Final thlen beiseina erawh Manipur lakah a thamral ta a ni.

Kan vanduai a ni

Mizoram coach Lal-tuakliana chuan, "Kan vanduai a ni, kim ila chu kan chak ang. A pa thihna avangin Sangsangi a haw a ngai a, kan midfielder pawimawh a ni. Kan player pawimawh K Lalruatfeli leh Lalnuntluangi inhliam kan tuar bawk a, a uiawm takzet a ni. Kan player-te ka chhuang takzet a ni," a ti.