A vawi khat nan West Ham an chak ve ta
West Ham fan-ten season tharah lawma auna tur an nei ve ta. Premier League match thum ngawt a zawna an tlawm hnuah League Cup second round-ah hnehna an chang a, an mikhualna ramah League One club AFC Wimbledon chu 3-1 in an hneh.
Premier League club dang inlan zingah Bournemouth chuan 3-0 in MK Dons an sawp a, Leicester City chuan Fleetwood Town lakah goal li ngawta hnehna changin an chak ve bawk a, Crystal Palace chuan 1-0 in Swansea City an hneh bawk.
Hetihlai hian Premier League club Huddersfield Town chu Championship club Stoke City chuan 2-0 a hnehin an hnawt chhuak thung a, Stoke tan Saido Berahino chuan kum hnih leh a chanve ngawt competitive goal a khung loh hnuah a khung ve leh ta!
Hammers chhut a na!
West Ham-in League One club an hmachhawn avangin awlsam taka chak tura ngaih an ni. Mahse, season hmasa lawka non-league lama a hun la hmang Joe Pigott chuan minute hnihnaah Wimbledon tan goal hmahruai a khung a, Hammers an hawihai.
Wimbledon hlim chhung erawh a rei lo. Minute 18-naah Rod McDonald chu hnawhchhuah a ni a, Wimbledon-in kim lo chungin hun tam zawk an khel. Hammers hian a tam zawk an nih chhawr ṭangkaiin second half-ah Issa Diop, Angelo Ogbonna leh Javier Hernandez te hmanga goal khungin 3-1 in an chak.
West Ham boss Manuel Pellegrini chuan, "Hma taka goal kan chhuah avangin ka hlauthawng hman a, mahse ka player ten hahdam taka khelin an theihna an pholang a ni. Zanin kan chak hi kan tan a pawimawh hle," tiin a sawi.
Hammers tan Borussia Dortmund aṭanga lakluh, Ukraine forward Andriy Yarmolenko leh Arsenal aṭanga an lei Spanish forward Lucas Perez te chuan a vawi khat nan inkhel bul an ṭan.
Goal khung thiam
Bournemouth leh Leicester City-in division hniam zawk club lakah zahngaihna an lantir lo. Cherries (Bournemouth sawina) hian League Two club MK Dons chu 3-0 ngawtin an sawp a, Lys Mousset, Ryan Fraser leh Jordon Ibe ten goal khat ṭheuh an khung.
Cherries manager Eddie Howe chuan, "Ka hlim takzet a ni. Goal ṭha tak tak kan khung a, mahse pa duhtui tak ka nih avangin second half-ah khan kha aia ṭha zawk khan kan la khel thei tih ka hria a ni," a ti.
Foxes-in Jamie Vardy siam liantu League One club Fleetwood Town an mikhual a, English striker hi hrem vangin a inlan thei lo thung. Tlarhmaa an chhuanvawr ber tel lo chungin harsatna erawh an tawh phah lo a, Christian Fuchs, Vicente Iborra, Rachid Ghezzal leh Kelechi Iheanacho ten goal khat
ṭheuh an khung.
Joey Barton enkawl Fleetwood hi an vannei zawk a, kum 21 mi Iheanacho chuan post vawi hnih ngawt a tih per. Hetihlai hian Foxes tan Liverpool aṭanga pound maktaduai 12.5-a an lakluh Danny Ward chuan a vawi khat nan si ban a nghak bawk.
Berahino leh goal
English striker beiseiawm ber pawla ngaih Berahino-a'n West Brom aṭanga Tottenham Hotspur a pan theih loh hnuah kum 2017 khan Stoke City a pan a, mahse Thawhlehni zan hma kha chuan Stoke tan hian goal a khung miah lo!
Ni 913 zet goal khung tawh lo striker hian James McClean-a bar tih per chu a tauh lut a, Huddersfield player thar Juninho Bacuna chuan an lamah a ti lut bawk. Stoke boss Gary Rowett chuan, "Berahino hi kum 25 mi chauh a la ni a, hmabak eng tak a la nei a ni," a ti.
Hetihlai hian Crystal Palace chuan 1-0 in Swansea City an hneh ve bawk a, he inkhela goal awmchhun hi Palace tana a vawi khat nana goal khungtu Alexander Sorloth pet luh a ni.
Crystal Palace manager Roy Hodgson chuan, "Game ṭha tak kan khel a ni," tiin a naute khelh danah a lawm thu a sawi.
League Cup second round result
Swansea City 0 - 1 Crystal Palace
Wimbledon 1 - 3 West Ham
Blackburn Rovers 4 - 1 Lincoln City
Bournemouth 3 - 0 MK Dons
Brentford 1 - 0 Cheltenham Town
Brighton & Hove 0 - 1 Southampton
Burton Albion 1 - 0 Aston Villa
Cardiff City 1 - 3 Norwich City
Doncaster Rovers 1 - 2 Blackpool
Fulham 2 - 0 Exeter City
Hull City 0 - 4 Derby County
Leeds United 0 - 2 Preston North End
Leicester City 4 - 0 Fleetwood Town
Middlesbrough 2 - 1 Rochdale
Newport County 0 - 3 Oxford United
QPR 3 - 1 Bristol Rovers
Sheffield Wednesday 0 - 2 Wolverhampton
Walsall 3 - 3 Macclesfield Town
*Penalty-ah 3-1 in Macclesfield an chak
Wycombe 2 - 2 Forest Green
*Penalty-ah 4-3 in Wycombe an chak
Stoke City 2 - 0 Huddersfield Town
West Bromwich 2 - 1 Mansfield Town