Ferrari chungah Vettel a lawm

Sebastian Vettel chuan tun hnaia Ferrari hma­sawnna a hmuh hmaih lo a, tun ang zela an kal thei a nih chuan Mercedes tlan pelin Formula 1 cham­pion an nih theih ngei a beisei thu a sawi chhuak.

Tun hnai season thum chhung chu Ferrari hian Mercedes an phak lo, a bik takin season hma­sa chawhnu lam khan an inthlau hle. Mahse, kar hmasa a tlan zawh tak Belgian Grand Prix-ah erawh Ferrari an chungnung zawk, German driver hian hnehsawh takin hnehna a chan theih phah.

Driver champion lai Lewis Hamilton pawhin an elpui Ferrari chet-

ṭhat zia a hmuh hmaih lo, Britain tlangval hian, "Zep tur a awm lo, intlansiak hnuhnung berah khan chuan team ṭha zawk an ni a, an car pawh a chak zawk," a ti hial.

World champion vawi li ni tawh Vettel chuan, "Engine thar kan hmang a, hei hian kan harsatna tawh ṭhin lian tak kha chu a sukiang nghal niin ka hria, engkim mai hi a fuh chho vek a, tunah chuan season dang zawng aiin beiseina pawh kan nei sang thei ang.

"F1 car ka khalh tawh zinga ṭha leh chak berte zinga mi kan khalh thei hi ka lawm, chutihrualin hmasawnna tur nei lo erawh kan ni lo. Tun dinhmunah Mercedes kan la phak lo tih kan hriat reng a ngai," tiin a sawi.

Vettel hian point 214 hmu tawhin cham­pionship-ah pahnihna a ni mek, an chungah hian point 231 hmu tawh Hamilton a awm - season dang ang bawkin driver pahnih hi an inel tawk leh hle tura ngaih a ni. Team championhsip lamah pawh Mercedes chu Ferrari chungah an awm mek.

Formula 1 season kal laiah intlansiak vawi 21 a awm dawn a, heng zingah 13 chu an tlan tawh. Grand Prix 14-na ni turin September 1 zan hian Italian Grand Prix an tlan leh ang.