Mizoram aiawh tur Cricket Team an puang

Cricket Association of Mizoram chuan Thawhlehni khan Vijay Hazare Trophy-a Mizoram aiawh tur player 12 awmna team an puang. Inelnaah hian professional player pathum a lak theih a, CAM general secretary Mamon Majumder chuan September 1 hian tihchian an tum thu Vanglaini a hrilh.

Mizoram team captain atan India Junior Team tan inlan tawh K. Vanlalruata chu ruat a ni a, Kulikawn tlangval Michael Lalremkima chu vice captain atan ruat niin coach atan Mizo zinga National Cricket Academy aṭanga coaching certificafe Level A nei awmchhun Lalruatsanga Vanchhawng chu ruat a ni.

Inelna hi

Vijay Hazare Trophy-ah team 37 an tel dawn a, group paliah ṭhenhran niin Mizoram hi team nem deuh dah khawmna Plate Group-ah Arunachal Pradesh, Bihar, Manipur, Meghalaya, Nagaland, Puducherry, Sikkim leh Uttarakhand te nen an awm khawm.

Inelna hi One Day a ni a, 50 overs niin inelna ngaihhlut zawk Ranji Trophy inpuahchah nan hman ṭhin a ni a. Plate Group aṭang hian group hmahruaitu chauhin quarterfinal an lut dawn a, tawnhriat nei tlem Mizoram tan a harsa ang.

Chona thar

CAM general secretary Mamon chuan, "Mizoram tan chuan a harsa dawn a, a laihawla awm phak kan tum ang. NorthEast state dang hi kan elpha turah kan ngai a, chumi tur chuan tawnhriat nei ṭha tawh captain Ruata te hi an pawimawh dawn. Kan player dang te pawh hi an zin chhuak fo tawh a, chuvang chuan inrintawkna an nei ang," tiin Vanglaini a hrilh.

Mizoram result hi professional player an lak ṭhat dan a zirin kawng thui tak a hril dawn. CAM hian hemi atan hian trial kalpui tawhin trial zingah Kings XI Punjab leh Rajasthan Royals team-a a lo awm tawh leg spinner Sinan Khader chu mit la zinga mi a ni.

Mamon chuan, "India ram pitch hi chu spinner leh batsman ṭhatna hmun a ni a, chuvangin spinner ṭha leh batsman ṭha hi chu kan lakluh a ṭulin ka hria. Trial rawn hmachhawn hoah pawh ṭha tak tak chu an awm a, chutihrualin professional ṭha chin chuan trial an hmachhawn meuh lo. Player pathum kan lak turah pawh hian pakhat tal hi chu langsar ve tak a ni ang," tiin a sawi.

Vijay Hazare Trophy hi September 19 aṭanga khelh ṭan tur a ni a, Mizoram hian match hmasa berah Arunachal Pradesh an hmachhawn ang. CAM hian senior team squad puan rual hian Under 19 - Vinoo Mankad Trophy leh Under 16 - Vijay Merchant Trophy khel tur squad an puang nghal bawk.

Mizoram Cricket Team - Vijay Hazare Trophy
K .Vanlaruata, Captain Durtlang
Michael Lalremkima, Vice Captain Kulikawn
Lalhmangaiha Dawrpui
C. Lalrinsanga Tlangnuam
Gaurav Singh Khatla
Saidingliana Sailo Siaha
Lalhruaimawia Ralte Bawngkawn
G. Lalbiakvela Luangmual
Lalnuntluanga Ramhlun North
Zorinliana Zarkawt
R. Lalnunkima Khatla
Lalrempuia Champhai
Coach : Lalruatsanga Vanchhawng, Chanmari
K.Lalremruata Upper Republic
Darremsanga Laipuitlang
H.Zothanchhunga Durtlang
Andrew Vanlalhruaia Armed Veng
Bobby Zothansanga Chaltlang
K.Lalhmingmawia Armed Veng