Kum li hnua Champions League khel tur Ajax
European champion vawi li ni tawh Ajax chuan kum li hnua a vawi khat nan Champions League an khel ve leh dawn ta.
Dutch club hian Champions League playoff second leg-ah Dynamo Kiev chu goal khung loin an inhnehtawkpui a, inkhel hmasa zawkah 3-1 a an lo hneh tawh avangin Europe-a club inelna sang bera inlan turin an tling.
Playoff inkhel dangah Celtic pet chhuaktu AEK Athens chu Chamions League khel turin an inpet kai ve bawk a, 2-1 a an hneh tawh hnu MOL Vidi chu 1-1 a inhnehtawkpuiin inkhel pahnih belhkhawmah 3-2 in an chak.
Swiss club BSC Young Boys chuan Croatia club ṭha Dinamo Zagreb barakhaihin khualmualah 2-1 in an hneh a, inkhel hmasaah 1-1 a an lo inhnehtawk tawh bawk avangin Champions League an khel dawn.
Hello Ajax
Ajax-in an mikhualna ramah goal khung harsat mah se mahni muala an khelh ṭhat rah an seng a, European club lian zinga chhiar tel ṭhin hian Champions League an khel ve leh dawn ta.
Dutch club hian inkhel hmasa zawkah Dynamo hi Hakim Ziyech, Dusan Tadic leh Donny van de Beek goal khung hmangin 3-1 in an lo sawp tawh a, Ukraine-a inkhelah erawh goal an zawng hmu hleithei lo.
Ajax hian penalty pawh hlawh chhuak mah se Dusan Tadic chuan post pet per nan a hmang a, inkhel hmasa zawka goal khungtu vek Hakim chuan freekick hmangin crossbar a pet per a, Klaas Jan Huntelaar chuan a hun ṭha neih a chhawr thei lo bawk.
Ukrainian club tan goalkeeper Denys Boyko chu fak tlak a ni a, ram tana vawi nga inlan tawh goalkeeper hian vawi tam save ṭha a nei a, mahse an tlarhma an bil miau avangin goalkeepeer chet ṭhat a tawk lo.
Hei le Young Boys
Swiss Super League club BSC Young Boys-in kum 32 zet chu European club-te inelna sang berah an hmel an lan tawh lo a, season thum chhung chu a zawnin Champions League qualifying lamah hnawhchhuah an ni tawh bawk.
Tun season-ah erawh Young Boys tan thawnthu a danglam ta. Minute sarihna lekah Izet Hajrovic chuan Croatian club tan goal hmahruai rawn khung mah se Young Bpoys-in talbuai nan an hmang duh lo.
Kum 34 mi striker Guillaume Hoarau chuan minute 64-naa an penalty hlawhchhuah chu si phurh sut nan a hmang a, minute hnih chauh a liam hman tihah khung belh leh bawkin 2-1 in an chak daih!
Inkhel pumpui thlir pawhin team pahnih an intum tawk hle - 50% ve ve ball an chang a, mualneitu team lamin vawi 14 ngawt shot an neih laiin Young Boys lam hian vawi 13 shot an nei ve tho.
Rin aia harsa
AEK Athens-in Hungary-ah Vidi chu 2-1 a an lo hneh tawh avangin Champions League group stage inpet kai chiang saa ngaih an ni a, mahse an beisei ang ngawt erawhin Greece-ah thil a awlsam lo.
Greek club tan hian Petros Mantalos chuan minute 48-naah goal hmahruai a khung a, penalty aṭangin a ni. Mahse, Hungarian club tan Loic Nego chuan rin loh takin si phurh a rawn sut a, Athens mipui an reh ṭhuap.
Hun tawp nan minute kua a la awm tihin AEK left back Helder Lopes hnawhchhuah zui a ni a, a tir lama dinhmun
ṭhaa ngaih AEK dinhmun a chhe thut - mahse Scotland beiseina Celtic hnawt chhuaktu team hian Champions League khelh an tum tih pholangin an ṭang tluan a, Europe-a club ṭha zingah inelna an hmachhawn ve dawn ta.
Nizan khan Champions League playoff khelh chhunzawm a ni a, club langsar PSV Eindhoven leh Benfica te pawh inlanin he thu buatsaih a nih lai hian an result kan hre hman lo.
Inkhel Result
Dinamo Zagreb 1 - 2 (2-3 agg) Young Boys
AEK Athens 1 - 1 (2-3 agg) Vidi
Dynamo Kiev 0 - 0 (1-3 agg) Ajax